Галоўчанка: Беларусі і Казахстану па сілах выйсці на тавараабарот у 1,5 млрд долараў

3 чэрвеня, Позірк. Беларусь і Казахстан за некалькі гадоў могуць нарасціць тавараабарот да 1,5 млрд долараў, заявіў прэм’ер-міністр Раман Галоўчанка 3 чэрвеня ў Мінску на сустрэчы з кіраўніком урада Казахстана Алжасам Бектенавым (паводле відэафрагментаў, апублікаваных прэс-службай Саўміна).

Паводле яго слоў, восенню Беларусь мае намер наведаць прэзідэнт краіны Касым-Жамарт Такаеў.

Найбольш перспектыўным у эканамічных узаемаадносінах з’яўляецца прамысловая кааперацыя, сказаў Галоўчанка.

Ужо сёння “сумесныя беларуска-казахстанскія прадпрыемствы, якія спецыялізуюцца ў першую чаргу на сельскагаспадарчым машынабудаванні, ствараюць сучасную прадукцыю з высокім дабаўленым коштам, забяспечваюць высокі ўзровень лакалізацыі, расце занятасць, фіксуецца рост падатковых паступленняў у бюджэт дзвюх краін”, сцвярджае ён.

Магутнасці сумесных прадпрыемстваў з удзелам беларускага капіталу ў Казахстане даюць магчымасць выпускаць да 10 тыс. трактароў і 1 тыс. камбайнаў у год, звярнуў увагу Галоўчанка.

У бліжэйшы час, заявіў ён, на пляцоўцы машынабудаўнічага прадпрыемства “МТЗ-Казахстан” у горадзе Кастанай плануецца наладзіць вытворчасць рухавікоў Мінскага маторнага завода.

“Ніхто не робіць больш у частцы лакалізацыі вытворчасці ў Казахстане цяпер”, лічыць прэм’ер-міністр Беларусі.

Ён звярнуў увагу на пастаўкі прадуктаў харчавання, беларускі экспарт якога ў Казахстан летась склаў каля 250 млн долараў: “Мы з’яўляемся важным пастаўшчыком малака і мяса на казахстанскі рынак. Гэта дапамагае ўмацоўваць харчовую бяспеку вашай краіны”.

У 2023 годзе, паводле звестак абодвух бакоў, узаемны тавараабарот перавысіў 1 млрд долараў.