Ціханоўская заклікала Ірландыю падтрымаць фонду дапамогі беларускім палітвязням

5 чэрвеня, Позірк. Далучыцца да падтрымкі міжнароднага гуманітарнага фонду дапамогі беларускім палітвязням заклікала Ірландыю дэмакратычны лідар Святлана Ціханоўская, паведаміў “Позірку” яе галоўны дарадца Франак Вячорка.

З такой ініцыятывай палітык звярнулася да генеральнага сакратара МЗС Ірландыі Джозэфа Хакетта падчас сустрэчы 5 чэрвеня.

Ціханоўская падзякавала Ірландыі за падтрымку культурных праектаў, а таксама за тое, што “ірландскія дыпламаты не ўручаюць дыктатару Лукашэнку даверчыя граматы”, адзначыў Вячорка.

На сустрэчы бакі таксама абмеркавалі санкцыі ЕС супраць Мінска. “У сувязі з тым, што прыняцце новага пакета санкцый чакаецца ў гэтым месяцы, Ціханоўская выказала надзею, што Еўрасаюз не зробіць ніякіх выключэнняў для калійных угнаенняў. Таксама яна выказалася на карысць спрашчэння працэдур легалізацыі ў краінах ЕС і атрымання віз простымі беларусамі”, — сказаў дарадца.

У сустрэчы таксама ўдзельнічала пасол Ірландыі ў Літве Шэна МакХ’ю.

Аб стварэнні міжнароднага фонду дапамогі беларускім палітвязням было абвешчана 30 красавіка 2024 года падчас візіту Ціханоўскай у Осла.

Першыя ўнёскі ў фонд зрабілі Нарвегія (850 тыс. еўра) і Швецыя (430 тыс. еўра).