Амерыканскі фонд уганараваў Ціханоўскую медалём “За заслугі перад дэмакратыяй”

7 чэрвеня, Позірк. Медалём “За заслугі перад дэмакратыяй” уганаравая кіраўніца Аб’яднанага пераходнага кабінета Святлана Ціханоўская, вынікае з паведамлення амерыканскага Нацыянальнага фонду падтрымкі дэмакратыі (NED), які заснаваў гэтую ўзнагароду.

Арганізацыя вырашыла адзначыць беларускага палітыка “за беспрэцэдэнтнае лідарства і асабістую ахвярнасць у імя абароны дэмакратыі ад аўтарытарызму”. У паведамленні яна сярод іншага названая “нацыянальным лідарам Беларусі” і “абраным прэзідэнтам Беларусі”.

Падкрэслена, што “пасля прымусовага выгнання Ціханоўская натхніла беспрэцэдэнтныя мірныя пратэсты ў Беларусі”, а пасля поўнамаштабнага ўварвання Расіі ва Украіну “ачоліла антываенны рух, скіраваны на прадухіленне ўдзелу Беларусі ў вайне”.

“Будучы лідарам беларускага дэмакратычнага руху, яна выступала за вызваленне больш як 1.500 беларускіх палітычных вязняў і мірную перадачу ўлады праз свабодныя і справядлівыя выбары. Ціханоўская з’яўляецца лаўрэатам прэміі Сахарава, міжнароднай Прэміі чатырох свабод 2022 года і прэміі Карла Вялікага”, — гаворыцца ў паведамленні.

Акрамя Ціханоўскай медалём NED сёлета ўганараваныя расійскі палітвязень, журналіст Уладзімір Кара-Мурза, лідар рэспубліканскай меншасці ў Сенаце ЗША Мітчал Маконэл, былая спікер Палаты прадстаўнікоў амерыканскага Кангрэса Нэнсі Пеласі, а таксама тыбецкі палітык Пенпа Цхерынг, другі дэмакратычна абраны сік’ёнг з Цэнтральнай тыбецкай адміністрацыі.

Медаль “За заслугі перад дэмакратыяй” уручаецца асобам, якія праявілі асабістую прыхільнасць да прасоўвання свабоды і правоў чалавека, а таксама будаўніцтва дэмакратычных інстытутаў. Сярод мінулых лаўрэатаў — сенатар Джон Макейн, дзяржсакратар Мадлен Олбрайт, экс-прэзідэнт Чэхіі Вацлаў Гавел ды інш.

Узнагароды будуць уручаныя 13 чэрвеня.