СМІ: У Беларусі могуць сфарміраваць новую брыгаду з “Іскандэрамі” на ўзбраенні

7 чэрвеня, Позірк. На тэрыторыі вайсковай часці ў Асіповічах (Магілёўская вобласць) будуюцца два ангары, па памерах і вонкавым выглядзе падобныя на хованкі для аператыўна-тактычных ракетных комплексаў “Іскандэр” (АТРК), паведамляе “Радыё Свабода” на падставе вывучэння спадарожнікавых здымкаў.

Такі ж ангар, паводле інфармацыі выдання, быў пабудаваны ў гэтай вайсковай часці летась.

Адзначаецца, што ў ВЧ № 12147, дзе выяўленае будаўніцтва згаданых аб’ектаў, таксама “рэканструююцца закінутыя казармы і адміністрацыйны будынак”.

У артылерыйскай вайсковай частцы дыслакуецца ў тым ліку 465-я ракетная брыгада. Як мінімум адзін з яе дывізіёнаў мае на ўзбраенні АТРК “Іскандэр-М”, здольны несці ядзерную баявую частку.

Паведамляецца, што “ўсяго ў Беларусі можа быць два такія ракетныя дывізіёны”.

“Зыходзячы са спадарожнікавых здымкаў ад сервісу Planet Labs, атрыманых 19 траўня 2024 года, можна заўважыць, што будоўля закранула значную тэрыторыю вайсковай часці, дзе знаходзяцца “Іскандэры”, — гаворыцца ў публікацыі.

Гаворачы аб ангары, пабудаваным летась, выданне паведамляе, што яго ўзвядзенне працягвалася з восені 2022-га да красавіка 2023-га.

Сцвярджаецца, што кожны з гэтых аб’ектаў можа змяшчаць “12 баявых машын”, што падыходзіць пад памеры стандартнага дывізіёна “Іскандэраў” ва Узброеных сілах РФ. У дывізіён могуць уваходзіць да 6 машын розных тыпаў: камандна-штабная машына, машына жыццезабеспячэння, самаходная пускавая ўстаноўка з ракетамі, транспартна-зараджальная машына, рухомы пункт падрыхтоўкі інфармацыі і машына рэгламенту і тэхабслугоўвання.

Ваенны аналітык і дырэктар кампаніі Rochan Consulting, якая даследуе канфлікты і бяспеку на постсавецкай прасторы, Конрад Музыка адзначае ў каментары, што “калі зыходзіць з расійскага стандарту дывізіёна “Іскандэраў”, як, напрыклад, на тэрыторыі 152-й ракетнай брыгады ў Калінінградскай вобласці Расіі”, то пабудова яшчэ двух ангараў для захоўвання гэтых комплексаў можа сведчыць аб тым, што на тэрыторыі ВЧ № 12147 хочуць сфарміраваць новую брыгаду і, адпаведна, брыгадны камплект ракетнага комплексу “Іскандэр-М”.

“Калі мы ведаем, што Беларусь атрымала два батальёны “Іскандэраў”, гэта значыць восем пускавых установак з ракетамі, — выходзіць, што, калі расіяне паставяць яшчэ адзін дывізіён, то гэта будзе поўная брыгада, — падкрэслівае эксперт. — На здымках відаць, што беларусы будуюць аб’ект, дзе гэтая брыгада можа быць размешчаная. Усяго гэта 12 пускавых установак. Для абслугоўвання спатрэбіцца каля 500 чалавек”.

7 траўня гэтага года Аляксандр Лукашэнка распарадзіўся правесці ва Узброеных сілах “раптоўную праверку сродкаў — носьбітаў нестратэгічнай ядзернай зброі”. Паводле яго слоў, у гатоўнасць да выканання задач па прызначэнні прыводзіўся дывізіён аператыўна-тактычнага комплексу “Іскандэр” і эскадрылля самалётаў Су-25.

1 лютага 2023 года Мінабароны паведаміла, што беларускія вайскоўцы прыступілі да поўнай самастойнай эксплуатацыі АТРК “Іскандэр”.

“Іскандэр” — расійскае сямейства АТРК. Яго асноўнае прызначэнне — знішчэнне сістэм СПА і ПРА верагоднага праціўніка, а таксама важных аб’ектаў (масты, склады, камандныя пункты і вузлы сувязі, самалёты і верталёты на аэрадромах, аб’екты інфраструктуры, скапленні войскаў і тэхнікі, іншыя АТРК, дывізіённую артылерыю, караблі).

Комплексы могуць выкарыстоўваць як крылатыя, так і квазібалістычныя ракеты.

З ракет сямейства далёкасць дзеяння ад 300 да 500 км мае мадыфікацыя “Іскандэр‑М”, якая знаходзіцца на ўзбраенні УС РФ.