Латвія плануе дадаткова выдзеліць 10 млн еўра на ўмацаванне мяжы з Беларуссю і РФ

17 чэрвеня, Позірк. Урад Латвіі плануе выдзеліць Міністэрству абароны 10 млн еўра для “выканання плана ўмацавання ўсходняй мяжы Латвіі”, паведамляе партал grani.lv.

Рашэнне чакаецца на гэтым тыдні. Улады маюць намер выкарыстоўваць грошы з рэзервовых фондаў бюджэту.

План, зацверджаны ўрадам сёлета ў сакавіку, з’яўляецца часткай фармуемай Балтыйскай лініі абароны. Ён уключае ў сябе “стварэнне апорных пунктаў для падраздзяленняў нацыянальных узброеных сіл уздоўж усёй расійска-беларускай мяжы — абарончых пазіцый і ўмацаванняў для салдат, розных перашкод, супрацьтанкавых равоў, складоў боепрыпасаў ды мін”.

“Каб прадухіліць перамяшчэнне праціўніка, умацаванне мяжы ў Латвіі пачнецца з перакопкі існых дарог для стварэння супрацьтанкавых равоў, пазней у такія равы таксама будуць пераўтвораныя дрэнажныя каналы ўздоўж мяжы, — паведамляла раней латвійскае Мінабароны. — Будуць усталяваныя розныя тыпы загарод — супрацьтанкавыя равы ўмацуюць бетоннымі блокамі і так званымі “зубамі дракона”, супрацьтанкавымі мінамі. Перашкоды будуць усталяваныя з улікам мясцовасці, з выкарыстаннем натуральных бар’ераў — балот, лясоў, іншых прыродных аб’ектаў”.

Чакаецца, што першы этап плана будзе рэалізаваны да кастрычніка.

Практычнае ўмацаванне ўсходняй мяжы пачалося ў сакавіку. У найбліжэйшыя пяць гадоў у гэтую справу будзе ўкладзена 303 млн еўра.

Міністры абароны Літвы, Латвіі і Эстоніі падпісалі пагадненне аб фармаванні Балтыйскай лініі абароны ў студзені 2024 года.

Краіны Балтыі прынялі рашэнне ўмацоўваць усходнюю мяжу на фоне міграцыйнага крызісу і ў святле патэнцыйных ваенных пагроз, якія зыходзяць ад Масквы і Мінска.