26 чэрвеня, Позірк. У ліпені ў Беларусі будзе рэалізаваны праект “Вызваленне. Шлях да Перамогі”, паведамляе “Спутник Беларусь”.
Ён уключае ў сябе фотавыставу з фондаў “Саўінфармбюро”, а таксама эпізоды падкаста “Вызваленне”, прысвечаныя 80-годдзю аперацыі “Баграціён” і вызваленню Мінска ад нацыстаў.
Фотавыстава будзе дэманстравацца ў мінскім парку Перамогі з 1 па 8 ліпеня, пасля чаго пераедзе ў Віцебск. Адзначаецца, што “дзве арыгінальныя фотавыставы адкрыюцца ў Барысаве і Брэсце — 1 і 28 ліпеня адпаведна”.
Праект праводзіцца пры падтрымцы расійскага Прэзідэнцкага фонду культурных ініцыятыў.
Дзяржаўная медыягрупа “Россия сегодня” пазіцыянуе сябе як правапераемніка “Саўінфармбюро”, у Беларусі прадстаўлена рэсурсам “Спутник Беларусь”.
У 1991-1996 гадах Дзень незалежнасці Беларусі быў прымеркаваны да даты прыняцця Дэкларацыі аб дзяржаўным суверэнітэце — 27 ліпеня. У выніку ініцыяванага Аляксандрам Лукашэнкам у 1995 годзе рэферэндуму галоўнае дзяржаўнае свята было перанесена на 3 ліпеня — дзень вызвалення Мінска ад гітлераўскай акупацыі ў 1944 годзе.
Як паведамлялася, з 10 да 13 чэрвеня Мінск наведалі студэнты і школьнікі з акупаванага Расіяй Мелітопаля (Запароская вобласць Украіны) у рамках праекта “На абароне межаў сваёй Айчыны”, які рэалізуе грамадская арганізацыя “Мясцовая нацыянальна-культурная аўтаномія беларусаў гарадской акругі Мелітопаль” на грант, выдзелены спецыяльным фондам Пуціна.
Праўладнае грамадскае аб’яднанне “Саюз пісьменнікаў Беларусі” за кошт гранта Адміністрацыі прэзідэнта РФ арганізавала ў красавіку літаратурны фестываль “Русь і Беларусь адзіная”.
