У першым квартале даўгі прадпрыемстваў раслі, прыбытак і рэнтабельнасць зніжаліся — Нацбанк
27 чэрвеня, Позірк. Нягледзячы на павелічэнне выручкі ад рэалізацыі прадукцыі, тавараў, работ, паслуг, прыбытак беларускіх прадпрыемстваў у першым квартале знізіўся, сведчыць праведзены “Позіркам” аналіз даных Нацыянальнага банка.
Агульны аб’ём рэалізацыі павялічыўся на 12,9% (з 89.435,2 млн рублёў за студзень — сакавік 2023-га да 101.013 млн за аналагічны перыяд 2024-га).
Сабекошт рэалізаванай прадукцыі, тавараў, работ, паслуг вырас на 15,7% (з 72.573,7 млн да 83.975, 2 млн).
Чысты прыбытак паменшыўся на 11,7% (з 4.937,4 млн да 4.361,9 млн), рэнтабельнасць продажаў — на 1,6 працэнтных пункта (з 7,9% да 6,3%), рэнтабельнасць рэалізаванай прадукцыі — на 2,2 п.п. (з 9,7% да 7,5%).
Доля стратных арганізацый да іх агульнай колькасці павялічылася на 0,1 п.п. (з 16,3% да 16,4%).
Крэдыторская запазычанасць (даўгі прадпрыемства) павялічылася за першую чвэрць года на 4% (з 80.261,7 млн на 1 студзеня да 83.449,2 млн на 1 красавіка), у тым ліку пратэрмінаваная — на 2,9% (з 9.722,7 млн да 10.009,2 млн).
Дэбіторская запазычанасць (даўгі прадпрыемству) вырасла на 4,3% (з 66.931,2 млн да 69.819,9 млн), у тым ліку пратэрмінаваная — на 1% (з 8.938,6 млн да 9.023,8 млн).
Запазычанасць па крэдытах і пазыках — на 3,8% (з 111.853,4 млн да 116.095,7 млн), у тым ліку пратэрмінаваная — на 3,1% (з 2.229,7 млн да 2.299,3 млн).
3 кастрычніка 2023 года на нарадзе па продажах айчыннай прадукцыі Аляксандр Лукашэнка падкрэсліў, што для беларускай эканомікі “пытаннем пытанняў” з’яўляецца дэбіторская запазычанасць. “Па “дэбіторцы”, я сказаў, ніякіх спасылак [не павінна быць] на тое, што дзесьці плацяжы не ідуць, яшчэ нешта”, — сказаў ён.
Паводле яго слоў, у Нацбанку і “спадарожных структурах” працуе “не адна тысяча” супрацоўнікаў. “Таму давайце разам з урадам займайцеся і пачынайце працаваць, калі можаце. А на гэтую тэму, зноў жа, больш размоў быць не можа”, — падкрэсліў Лукашэнка.
9 красавіка гэтага года на нарадзе аб развіцці прамысловасці ён канстатаваў, што не выкананыя яго патрабаванні па скарачэнні знешняй пратэрмінаванай дэбіторскай запазычанасці, якая за 2023 год вырасла больш чым на 10%.
Галоўчанка: З пяці паказчыкаў сацыяльна-эканамічнага развіцця выкананыя чатыры (дапоўнена)
дададзены абзацы 3–8 17 чэрвеня, Позірк. За студзень — травень з пяці асноўных паказчыкаў сацыяльна-эканамічнага развіцця "цалкам выкананыя і перавыкананыя чатыры", заявіў прэм'ер-міністр Раман Галоўчанка 17 чэрвеня падчас даклада Аляксандру Лукашэнку. “Валавы ўнутраны прадукт склаўся на ўзроўні 105,2%, інвестыцыі на ўзроўні 109,6%, …