У Полацку выяўлена зброевая майстэрня, арганізатары затрыманы
2 ліпеня, Позірк. У Полацку (Віцебская вобласць) выяўлена майстэрня па вырабе зброі, паведамляе прэс-служба Міністэрства ўнутраных спраў.
Паводле звестак ведамства, у садовым доміку двое жыхароў Полацка 65 і 64 гадоў выраблялі і рамантавалі агнястрэльную і халодную зброю. Яны затрыманы.
Канфіскавана шэсць самаробных пісталетаў, самаробная вінтоўка з прыборам для бясшумнай стральбы і прыцэльнай прынадай, чатыры пнеўматычныя вінтоўкі, порах, патроны рознага калібру. Мужчыны таксама захоўвалі вялікую колькасць састаўных частак стралковай зброі, 19 паляўнічых нажоў саматужнай вытворчасці, два штык-нажы да аўтамата Калашнікава.
Таксама знойдзена такарнае абсталяванне, якое выкарыстоўвалася пры вырабе самаробнай зброі, гаворыцца ў рэлізе.
СК узбудзіў крымінальную справу за незаконныя дзеянні ў дачыненні да агнястрэльнай зброі і боепрыпасаў (арт. 295 КК). Яе санкцыя прадугледжвае да 10 гадоў пазбаўлення свабоды.
Сілавікі перыядычна паведамляюць аб знаходжанні арсеналаў са зброяй.
17 красавіка стала вядома, што ў Баранавічах (Брэсцкая вобласць) затрыманы 27-гадовы мясцовы жыхар, які прыцягнуў увагу як “актыўны ўдзельнік дэструктыўных тэлеграм-каналаў”, паведаміла прэс-служба МУС.
Пры аглядзе месца яго жыхарства знойдзена вялікая колькасць стралковай зброі і боепрыпасаў: пісталеты, кулямёты, гранаты, патроны, а таксама сродкі сувязі і халодная зброя. Увесь арсенал канфіскаваны і накіраваны на экспертызу. Мужчына прызнаўся, што займаецца чорным капацтвам і калекцыянуе зброю.
23 лістапада 2023 года МУС паведамляла, што ў затрыманай у вёсцы Вялікі Лес (Крупскі раён) “злачыннай групы” падчас ператрусу знойдзены “вялікі арсенал халоднай, агнястрэльнай зброі, боепрыпасаў і выбуховых рэчываў”. Гаворка ішла пра 62-гадовага мужчыну і двух яго сыноў, аднаго з якіх сілавікі паранілі падчас затрымання, ужыўшы болевую зброю.
Па выніках апошняй аперацыі “Арсенал”, якая праводзілася ў Беларусі 9–13 кастрычніка мінулага года, канфіскавана больш за 1,5 тыс. адзінак зброі.