Беларусь выдала Турцыі двух яе грамадзян

16 ліпеня, Позірк. Па рашэнні Генеральнай пракуратуры ў Турцыю экстрадаваныя два грамадзяніна гэтай дзяржавы, паведаміў намеснік начальніка Нацыянальнага цэнтральнага бюро Інтэрпола ў Беларусі Леанід Рахленка.

Яго відэакаментарый апублікавала прэс-служба МУС.

Паводле слоў Рахленкі, у рамках “міжнароднага паліцэйскага ўзаемадзеяння” супрацоўнікі беларускіх сілавых органаў “паспяхова адпрацавалі інфармацыю аб вышуку замежных грамадзян, якая паступіла па каналах Інтэрпола”.

У выніку па запыце турэцкіх уладаў выдадзены 43- і 40-гадовы мужчыны.

Першы быў абвешчаны ў міжнародны вышук за “ўдзел у дзейнасці тэрарыстычнай арганізацыі”, адзначыў Рахленка. У Беларусі яго затрымалі і асудзілі за спробу “перасячэння мяжы з падробленымі дакументамі”.

Яго суайчыннік адбываў у Беларусі пакаранне ў выглядзе 17 гадоў пазбаўлення волі за забойства грамадзянкі Бангладэш, здзейсненае ў 2018 годзе ў Віцебску.

Працэдура экстрадыцыі прайшла ў Нацыянальным аэрапорце Мінск.

Памежнікі затрымалі ў Гродне 41-гадовага грамадзяніна Літвы. Гэта адбылося яшчэ 28 чэрвеня, аднак прэс-служба Дзяржпагранкамітэта паведаміла аб тым, што здарылася, толькі 16 ліпеня. Адзначаецца, што затрыманы хаваўся ў Беларусі ад крымінальнага пераследу ў Літве.

“Пасля правядзення ўсіх неабходных працэсуальных дзеянняў у рамках узбуджанай крымінальнай справы замежніка чакае дэпартацыя ў Літву”, — гаворыцца ў паведамленні.

На прэс-канферэнцыі 25 чэрвеня ў Мінску намеснік генеральнага пракурора Аляксей Стук заявіў, што Беларусь, “імкнецца выконваць” просьбы замежных калегаў. Ён нагадаў, што Мінск задаволіў усе тры запыты Вільнюса аб выдачы асоб для крымінальнага пераследу. “Два злачынствы супраць палавой недатыкальнасці і адно — прычыненне цяжкіх цялесных пашкоджанняў. <…> Відавочна, нам такія людзі тут не патрэбныя. Забірайце і разбірайцеся з імі”, — аргументаваў рашэнне беларускага боку Стук.

“Цяпер у нас на разглядзе знаходзіцца просьба латышскага боку і польскага боку. Гэтая просьба разглядаецца”, — дадаў ён.

Паводле слоў намесніка генпракурора, суседнія краіны адмаўляюць Беларусі ў яе запытах. Такую пазіцыю ён лічыць незразумелай: “Навошта яны ўтрымліваюць у сябе злачынцаў, [выдачу] якіх мы запытваем сапраўды па гэтых агульнакрымінальнай артыкулах?”