Прыняты законапраект, які ўзмацняе адказнасць за ўхіленне ад вайсковай службы

1 лістапада, Позірк. Палата прадстаўнікоў Нацыянальнага сходу (ПП НС) 1 лістапада ў першым чытанні ўхваліла законапраект “Аб змяненні законаў па пытаннях забеспячэння нацыянальнай бяспекі”.

У паведамленні прэс-службы ніжняй палаты парламента адзначаецца, што дакумент накіраваны на “карэкціроўку заканадаўства ў галіне абароны і нацыянальнай бяспекі” і сярод іншага прадугледжвае “павелічэнне санкцый за ўчыненне злачынстваў і адміністрацыйных правапарушэнняў, звязаных з ажыццяўленнем мерапрыемстваў па прызыву на вайсковую службу”.

Прапаноўваецца “надзяліць службовых асоб органаў дзяржаўнай бяспекі паўнамоцтвамі на складанне пратаколаў аб адміністрацыйных правапарушэннях за няяўку без паважных прычын на мерапрыемствы па прызыву на вайсковую службу”, а таксама “магчымасць зняцця ваеннаабавязаных з воінскага ўліку ў ваенных камісарыятах па месцы жыхарства і накіравання для пастаноўкі на воінскі ўлік у адпаведнае ўпраўленне Камітэта дзяржаўнай бяспекі па вобласці”.

Законапраект таксама дэлегуе Аляксандру Лукашэнку паўнамоцтвы па прыняцці рашэнняў “аб прыёме на вайсковую службу па кантракце грамадзян, з якімі кантракт аб праходжанні вайсковай службы не можа быць заключаны з-за ўстаноўленых абмежаванняў”.

Дакумент надзяляе вайсковыя камісарыяты правам абмяжоўваць выезд з краіны грамадзян, якія “парушаюць абавязкі вайсковага ўліку і ўхіляюцца ад мерапрыемстваў прызыву на вайсковую службу”, гаворыцца ў паведамленні ПП НС.

У праекце закона, апублікаваным на Нацыянальным прававым інтэрнэт-партале, прапануецца таксама дапоўніць арт. 39, уключыўшы ў яго абавязак прызыўнікоў з’яўляцца на “на мерапрыемствы прызыву” па мабілізацыі “будучы абвешчанымі з дапамогай СМС-паведамленняў”.

Пры гэтым “аператары электрасувязі ў дачыненні да грамадзян, якія стаяць або абавязаных знаходзіцца на вайсковым уліку, на запыт вайсковых камісарыятаў, упраўленняў Камітэта дзяржбяспекі ў абласцях абавязаныя ў тыднёвы тэрмін прадстаўляць звесткі аб абаненцкіх нумарах, забяспечваць апавяшчэнне абанентаў сетак сотавай рухомай электрасувязі праз накіраванне СМС-паведамлення”.

Акрамя гэтага, у дакуменце ўтрымліваецца палажэнне, згодна з якім “грамадзяне, якія дасягнулі 16 гадоў, маюць права прымаць удзел у выкананні работ абароннага характару ў мірны час да ўвядзення ваеннага становішча ў парадку, вызначаным Саветам Міністраў”.