Беларусь і Кітай рыхтуюць сустрэчы на высокім узроўні
23 ліпеня, Позірк. Падрыхтоўку сустрэч на высокім узроўні абмеркавалі 22 ліпеня ў Мінску міністр замежных спраў Максім Рыжанкоў і амбасадар Кітая Се Сяоюн, паведамляе прэс-служба беларускага знешнепалітычнага ведамства.
Падрабязнасці не прыводзяцца.
Бакі таксама абмеркавалі вынікі візіту кіраўніка МЗС Беларусі ў КНР 6–9 ліпеня.
Візіты на высокім узроўні, як правіла, азначаюць візіты кіраўнікоў парламентаў, урадаў (або іх намеснікаў), міністраў (замежных спраў, абароны, эканомікі), дэлегацый на чале з імі, спецыяльных прадстаўнікоў.
Падчас наведвання Пекіна Рыжанкоў сустрэўся ў тым ліку са сваім кітайскім калегам Ван І (8 ліпеня), загадчыкам міжнароднага аддзела правячай Камуністычнай партыі Кітая Лю Цзяньчао (9 ліпеня). З кіраўніком МЗС КНР беларускі чыноўнік абмеркаваў пытанні “двухбаковай супрацы, узаемадзеяння на міжнароднай арэне, глабальнай і рэгіянальнай бяспекі”, быў узгоднены “графік перспектыўных міждзяржаўных кантактаў на найвышэйшым і высокім узроўнях”. На сустрэчы з прадстаўніком кампартыі Рыжанкоў абмеркаваў пытанні бяспекі і канфлікты ў еўразійскім рэгіёне.
У сярэдзіне ліпеня кіраўнік МЗС у эфіры тэлеканала АНТ заявіў, што прадстаўнікі Беларусі падчас візіту перадалі кітайскаму боку шэраг дакументаў і “вельмі падрабязна патлумачылі прыроду рэчаў на мяжы” з Польшчай, што “было ўспрынята не проста з разуменнем, а было прынята”. Паводле сцвярджэння чыноўніка, “шантаж з нагоды транзіту кітайскіх тавараў” праз мяжу ў Варшавы “не атрымаўся ад слова зусім, як бы яны там ні харахорыліся”.
Прычына, з якой Рыжанкову давялося ў Кітаі апраўдвацца за сітуацыю на беларуска-польскай мяжы, ляжыць у сутнасці перамоў прэзідэнта Польшчы Анджэя Дуды і старшыні КНР Сі Цзіньпіна напрыканцы чэрвеня ў Пекіне. Кіраўнік польскай дзяржавы паведаміў суразмоўцу, што “гібрыдная атака” з боку рэжыму Аляксандра Лукашэнкі — міграцыйны крызіс на мяжы Беларусі і ЕС — з’яўляецца перашкодай для рэалізацыі кітайскай ініцыятывы “Адзін пояс — адзін шлях”.
Рыжанкоў сабраўся ў Паўночную Карэю з "афіцыйным візітам у адказ"
22 ліпеня, Позірк. Наведаць Карэйскую Народна-Дэмакратычную Рэспубліку 23–25 ліпеня мае намер беларуская дэлегацыя на чале з міністрам замежных спраў Максімам Рыжанковым, паведамляе прэс-служба знешнепалітычнага ведамства. Адзначаецца, што афіцыйны візіт пройдзе на запрашэнне МЗС КНДР. Заяўлена, што гэта візіт у адказ. Міністр замежных …