БАЖ: На журналіста Панкаўца заведзеная крымінальная справа за “сувязь з каліноўцамі”

25 ліпеня, Позірк. У дачыненні да журналіста Змітра Панкаўца распачатая крымінальная справа, паведамляе Беларуская асацыяцыя журналістаў.

Адзначаецца, што ў чэрвені па месцы рэгістрацыі Панкаўца ў Барысаўскім раёне (Мінская вобласць) быў праведзены ператрус.

“[Сілавікі, якія прыбылі з ператрусам] афіцыйна прадставіліся супрацоўнікамі Следчага камітэта, хоць у мяне ёсць здагадка, што гэта быў не Следчы камітэт. Пры гэтым, як я ведаю, прыехалі па мяне не з Барысава, а з Мінска”, — паведаміў БАЖ Панкавец.

У выніку ператрусу нічога не канфіскавана.

Паводле слоў журналіста, сілавікі паказалі панятым дакумент з інфармацыяй аб узбуджэнні справы. Паводле якога артыкула высунутае абвінавачванне, невядома.

“Справа нібыта за сувязь з каліноўцамі. Я сапраўды асвятляў гэтую тэму і шмат пісаў пра байцоў палка Каліноўскага ва Украіне. “Госці” таксама прасілі перадаць, што чакаюць мяне ў Беларусі і “грэюць кайданкі” для мяне. Пакуль ніякага развіцця сітуацыі не было”, — сказаў журналіст.

Зміцер Панкавец у журналістыцы амаль 20 гадоў, працаваў у выданнях “Наша Ніва” і “Радыё Свабода”, неаднаразова быў лаўрэатам журналісцкай прэміі “Вольнае слова”.

У снежні 2021 года, баючыся пераследу за прафесійную дзейнасць, выехаў з Беларусі.

Пасля 2020 года беларускія ўлады разгарнулі супраць незалежнай журналістыкі масавыя рэпрэсіі: была фактычна ўведзеная забарона на працу нелаяльных дзяржаве СМІ, усе яны былі прызнаныя “экстрэмісцкімі”. Праз рэпрэсіі прайшлі дзясяткі журналістаў, многія з іх былі арыштаваныя і прыгавораныя да турэмных тэрмінаў.

Паводле даных БАЖ, у няволі знаходзіцца 38 прадстаўнікоў медыя.