За тыдзень у Беларусь уехала 2.872 грамадзяніны Украіны — Дзяржпагранкамітэт

26 ліпеня, Позірк. За мінулы тыдзень (з 6:00 19 ліпеня па 6:00 26 ліпеня) у Беларусь уехала 2.872 грамадзяніны Украіны (за папярэднія сем дзён — 3.342), паведамляе Дзяржаўны памежны камітэт.

Транзітам праз Польшчу прайшло 2.315 (2.690), Літву — 502 (559), Латвію — 55 (93).

З пачатку года ў Беларусь уехала 76.280 грамадзян Украіны: непасрэдна з украінскай тэрыторыі — 32, транзітам праз Польшчу — 60.290, Літву — 14.898, Латвію — 1.060.

Усяго з 24 лютага 2022 года ў Беларусь прыбыла 222.772 грамадзяніны Украіны: праз украінска-беларускую мяжу — 15.950, транзітам праз Польшчу — 158.078, Літву — 43.148, Латвію — 5.596.

“Дзяржпагранкамітэт Беларусі займаецца несумленнай падачай лічбаў і чыстай вады маніпуляцыяй”, — заявіў у інтэрв’ю “Позірку” сёлета ў лютым амбасадар па асаблівых даручэннях МЗС Украіны па Беларусі Ігар Кізім. Паводле яго слоў, гаворку трэба весці пра звычайныя паездкі грамадзян Украіны ў Беларусь.

Дыпламат адзначыў, што ў адкрытых крыніцах даных пра колькасць украінцаў, якія выехалі з Беларусі, не знайсці. “Сумленным і прыстойным з боку ДПК было б даваць гэтую статыстыку”, — лічыць ён.

“Насамрэч гаворка ідзе не пра транзітных уцекачоў ці людзей, якія ўехалі ў Беларусь, каб папрасіць прытулак. Гэта, як і раней, простыя паездкі ўкраінскіх грамадзян”, — адзначыў Кізім.