З аўкцыёну прадаюць матацыкл і аўтамабіль палітвязня Эдуарда Бабарыкі

26 ліпеня, Позірк. На сайце пляцоўкі “Белюрзабеспячэнне” прадаюцца з аўкцыёну матацыкл Suzuki і аўтамабіль Mercedes-Benz, якія належаць палітвязню Эдуарду Бабарыка, вынікае з аб’яваў на партале.

Аўкцыён павінен адбыцца 21 жніўня. Стартавы кошт матацыкла 1992 года выпуску 5,1 тыс. рублёў, аўтамабіля 2019 года — 118 тыс.

Як сказана ў аб’яве, у абодвух транспартных сродках пры дыягносце і інструментальным кантролі могуць быць выяўлены схаваныя дэфекты.

Маёмасць палітвязня была арыштаваная Дэпартаментам фінансавых расследаванняў Камітэта дзяржкантролю.

Да затрымання ў чэрвені 2020 года Эдуард Бабарыка кіраваў ініцыятыўнай групай па зборы подпісаў за вылучэнне свайго бацькі Віктара Бабарыкі кандыдатам у прэзідэнты. Раней узначальваў краўдфандынгавыя платформы Ulej і MolaMola.

У ліпені (дакладная дата невядомая. — “Позірк”.) Эдуард Бабарыка быў прыгавораны па новай крымінальнай справе да двух гадоў пазбаўлення волі. Яго прызналі вінаватым паводле ч. 2 арт. 411 Крымінальнага кодэкса (злоснае непадпарадкаванне патрабаванням адміністрацыі папраўчай установы, якая ажыццяўляе пакаранне ў выглядзе пазбаўлення волі).

Справу ініцыявала 30 красавіка адміністрацыя бабруйскай папраўчай калоніі № 2, дзе Бабарыка-малодшы адбывае пакаранне.

5 ліпеня 2023 года Мінскі абласны суд прыгаварвыў палітвязня да васьмі гадоў пазбаўлення волі ва ўмовах узмоцненага рэжыму паводле ч. 3 арт. 243 (ухіленне ад выплаты падаткаў), ч. 6 арт. 16 і ч. 1 арт. 342 (саўдзел у арганізацыі і падрыхтоўцы дзеянняў, якія груба парушаюць грамадскі парадак), ч. 6 арт. 16 і ч. 3 арт. 130 (саўдзел у распальванні расавай, нацыянальнай, рэлігійнай альбо іншай сацыяльнай варожасці або варажнечы).

Эдуард Бабарыка утрымліваўся ў следчым ізалятары больш за тры гады.

У снежні 2023 года МУС унесла яго ў пералік асоб, “датычных да экстрэмісцкай дзейнасці”, а КДБ — у спіс асоб, “датычных да тэрарыстычнай дзейнасці”.

Віктар Бабарыка адбывае 14-гадовае пазбаўленне волі ва ўмовах узмоцненага рэжыму за” атрыманне хабару ў асабліва буйным памеры “(ч. 3 арт. 430) і “легалізацыю сродкаў, атрыманых злачынным шляхам” (ч. 2 арт. 235). Палітык віну не прызнаў.

У красавіку 2023 года з’явілася інфармацыя аб шпіталізацыі Бабарыкі-старэйшага ў наваполацкую бальніцу са слядамі збіцця і пнеўматораксам.