З аўкцыёну прададзены зямельны ўчастак Віктара Бабарыкі з лазняй

1 жніўня, Позірк. Зямельны ўчастак у вёсцы Мачаны (Лагойскі раён, Мінская вобласць), які належыць былому прэтэндэнту на пасаду прэзідэнта, палітвязню Віктару Бабарыку, прададзены на таргах за 331.647,01 рубля.

Пачатковы кошт маёмасці складаў амаль 152,7 тыс. рублёў, вынікае з інфармацыі вынікае з інфармацыі, размешчанай на пляцоўцы па продажы маёмасці “БелЮрЗабеспячэнне”.

Улады выставілі на аўкцыён участак плошчай 0,75 га ў канцы чэрвеня, аўкцыён пачаўся 7 ліпеня. Участак прызначаны “для вядзення асабістай падсобнай гаспадаркі” ў водаахоўнай зоне і прыбярэжнай паласе вадасховішча Вяча. На ім размешчана лазня “з прафіляванага бруса”.

Таксама на аўкцыён выстаўлены аўтамабіль Бабарыкі FORD FIESTA 2015 года.

Раней некалькі разоў праходзіў, але не адбыўся аўкцыён па продажы доляў палітвязня ў статутным фондзе ТАА “Прававы дыялог” і ТАА “Прыватлізінг”.

У 2023 годзе з аўкцыёну прададзена калекцыя гадзіннікаў Бабарыкі.

Таксама на сайце пляцоўкі “БелЮрЗабеспячэнне” зараз прадаюцца з аўкцыёну матацыкл і аўтамабіль, якія належаць сыну Бабарыка палітвязню Эдуарду Бабарыку. Аўкцыён павінен адбыцца 21 жніўня.

23 красавіка на электронным аўкцыёне была прададзена мінская кватэра палітвязня праваабаронцы Уладзіміра Лабковіча, размешчаная па адрасе вул. Тухачэўскага, 43. Выніковая сума здзелкі склала 145 тыс. 390 рублёў.

У гэты дзень на аўкцыён была выстаўлена “1/7 долі ў праве ўласнасці на адміністрацыйнае памяшканне ў Мінску пл. 92.1 кв. м.” па вул. Ложынскай, 16, якая належыць праваабаронцу Валянціну Стэфановічу. Аднак лот са стартавым коштам 33 тыс. рублёў не быў выкуплены.

11 чэрвеня стала вядома аб тым, што нерухомасць, якая належыць Стэфановічу паўторна выстаўлялася на аўкцыён, але ён зноў не адбыўся з прычыны “адсутнасці ўдзельнікаў”.

9 красавіка 2024 года з другой спробы на аўкцыёне была прададзена трохпакаёвая кватэра экс-прэтэндэнта ў прэзідэнты на выбарах 2020 года Валерыя Цапкала. Выніковы кошт нерухомасці склаў 395 тыс. 720 рублёў 27 капеек (пачатковая — 286 тыс. 753 рублёў 76 капеек). У таргах удзельнічалі тры чалавекі.

26 ліпеня 2023 года з трэцяга разу з аўкцыёну была прададзена мінская кватэра Сяргея і Святланы Ціханоўскіх.

6 ліпеня 2021 года Вярхоўны суд прыгаварыў Віктара Бабарыка да 14 гадоў пазбаўлення волі ва ўмовах узмоцненага рэжыму за “атрыманне хабару ў асабліва буйным памеры” (ч. 3 арт. 430 КК) і “легалізацыю сродкаў, атрыманых злачынным шляхам” (ч. 2 арт. 235 КК). Палітык віну не прызнаў.

Адбывае пакаранне ў наваполацкай калоніі №1 (Віцебская вобласць).

У красавіку 2023 года з’явілася інфармацыя аб шпіталізацыі Бабарыка ў наваполацкую бальніцу са слядамі збіцця і пнеўматоракс.