Украіна выйшла з пагаднення аб супрацоўніцтве з Беларуссю ў галіне ўрадавай сувязі

2 жніўня, Позірк. Аб выхадзе Украіны з міжурадавага пагаднення з Беларуссю аб супрацоўніцтве ў галіне ўрадавай сувязі паведаміў у сваім тэлеграм-канале прадстаўнік Кабінета міністраў у Вярхоўнай Радзе Тарас Мельнічук.

Дакумент быў падпісаны 6 лютага 1998 года ў Мінску. Акрамя яго спыняюць дзеянне дадатковыя пратаколы ад 1 лістапада 2000 года і 12 лютага 2014 года.

Пасля пачатку поўнамаштабнай вайны ва Украіне, у якой Беларусь падтрымлівае Расію, Кіеў скасаваў з Мінскам і ў рамках СНД шмат двухбаковых дагавораў аб супрацоўніцтве.

У прыватнасці, 30 красавіка паведамлялася, што Украіна выйшла з пагаднення з дзяржавамі — удзельніцамі СНД аб супрацоўніцтве ў галіне аховы здароўя насельніцтва, заключанага 26 чэрвеня 1992 года ў Мінску.

Аб выхадзе Украіны з пагаднення аб супрацоўніцтве ў галіне дзяржаўнага выпрабавання і аховы сартоў раслін з Беларуссю стала вядома 24 красавіка 2024 года.

22 снежня 2023 года Вярхоўная Рада Украіны адобрыла законапраект аб спыненні дзеяння міжурадавага пагаднення з Беларуссю аб свабодным гандлі.

29 лістапада таго ж года Беларусь заявіла аб спыненні дзеяння пагаднення аб узаемным пераводзе і выплаце пенсій (Украіна дэнансавала гэта пагадненне за паўгода да таго — 29 траўня).

19 верасня 2023 года абедзве палаты беларускага парламента прынялі, а Аляксандр Лукашэнка падпісаў закон “Аб прыпыненні дзеяння пагаднення паміж Рэспублікай Беларусь і Украінай аб рэгуляванні працэсу перасялення і абароне правоў перасяленцаў і членаў іх сем’яў”. Дакумент быў падрыхтаваны “ў рамках мер у адказ на недружалюбныя дзеянні Украіны ў дачыненні да Рэспублікі Беларусь”, яго рэалізацыя нібыта “будзе садзейнічаць абароне нацыянальных інтарэсаў” Беларусі.