Два дні запар МУС паведамляе пра выпадкі стральбы ў падазраваных, адзін чалавек загінуў
Фота носіць ілюстрацыйны характар
21 лістапада, Позірк. За апошнія два дні Міністэрства ўнутраных спраў двойчы паведаміла пра выпадкі, калі супрацоўнікі МУС стралялі на паражэнне пры затрыманні падазраваных у здзяйсненні злачынства.
Згодна з інфармацыяй прэс-службы МУС, апошні выпадак адбыўся 21 лістапада ў 8:10. Супрацоўнікі ГУБАЗіК МУС па Мінскай вобласці і АМАП УУС Мінаблвыканкама прыбылі ў адзін з дамоў у вёсцы Вялікі Лес (Крупскі раён). Паводле іх звестак, там знаходзілася “група ўзброеных людзей” — 62-гадовы гаспадар дома з двума сынамі 36 і 19 гадоў.
Бацьку і старэйшага сына затрымалі. Агонь быў адкрыты па 19-гадовым юнаку, які, як сцвярджаецца, “выйшаў на супрацоўнікаў з двума нажамі, выказваючы пагрозы”. Цяпер ён у бальніцы.
“Праваахоўнік зрабіў папераджальны стрэл, пасля чаго была выкарыстана зброя на паражэнне”, — гаворыцца ў паведамленні.
МУС апублікавала відэазапіс, на якім бачна: мінімум пяць амапаўцаў у поўнай амуніцыі (некаторыя са шчытамі) спачатку выломліваюць замок у дзверы металічнага плота, затым аказваюцца перад адчыненымі дзвярыма дома. З яго выходзяць мужчыны без зброі і на патрабаванне сілавікоў беспярэчна кладуцца на зямлю.
Затым дзеянне адбываецца ў памяшканні. Чутныя крыкі: “Кінь нож!”. Раздаецца адзін стрэл, чутны жаночы крык. Супрацоўнікі МУС некалькі разоў патрабуюць выкінуць нож, а затым нехта з іх кажа: “Выкінь нож — акажам дапамогу”. Далей ідзе ўказанне тэлефанаваць у хуткую дапамогу.
За дзень да гэтага прэс-служба МУС паведаміла пра званок у Рэчыцкі РАУС (Гомельская вобласць), які паступіў недзе апоўначы 19 лістапада. Жыхар вёскі Ліскі заявіў, што ў бок яго дома стралялі знаёмыя.
Было высветлена, што “заяўнік напярэдадні распіваў спіртное ў кампаніі прыяцеляў, затым пайшоў дадому”. “Пасля двое сабутэльнікаў 36 і 39 гадоў прыйшлі да яго дома з абвінавачваннямі ў крадзяжы алкаголю. Падчас сваркі адзін з іх выказваў пагрозы расправы з гаспадаром дома і яго сям’ёй, зрабіў стрэл з паляўнічай стрэльбы ў плот”, — гаварылася ў паведамленні.
Міліцыянты затрымалі 36-гадовага мужчыну. Другога знайшлі з паляўнічай стрэльбай на адной з вуліц вёскі. “На неаднаразовыя патрабаванні пакласці зброю на зямлю вясковец не рэагаваў і рухаўся са стрэльбай, накіраванай у бок міліцыянтаў і грамадзянскіх асоб. Супрацоўнікі зрабілі папераджальныя стрэлы ў паветра, затым адзін на паражэнне”, — паведаміла прэс-служба МУС.
Мужчына памёр у бальніцы.