Пракуратура пацвердзіла распаўсюджванне дзяржгазетай “экстрэмісцкіх матэрыялаў”, але нікога не пакаралі — БАЖ

15 жніўня, Позірк. Пракуратура Лепельскага раёна (Віцебская вобласць) прызнала, што дзяржаўная газета “Лепельскі край” распаўсюджвала “экстрэмісцкія матэрыялы”, аднак ніхто за гэта не быў пакараны, паведамляе Беларуская асацыяцыя журналістаў (БАЖ).

Адзначаецца, што ў згаданы наглядны орган звярнуўся віцебскі грамадскі актывіст Дзмітрый Карняенка, які паведаміў пракурорскім работнікам, што сайт раённага выдання ілюструе свае публікацыі фатаграфіямі разгромленага ўладамі партала tut.by.

Карняенка папрасіў пракуратуру даць ацэнку адпаведным публікацыям і прыцягнуць да адказнасці парушальнікаў паводле ч. 2 арт. 19.11 КаАП (распаўсюд, выраб, захоўванне, перавозка інфармацыйнай прадукцыі, якая змяшчае заклікі да экстрэмісцкай дзейнасці або прапагандуе такую дзейнасць).

Паводле даных БАЖ, у раённай пракуратуры актывісту адказалі, што рэдактару выдання Яне Міснік накіраванае прадпісанне ліквідаваць “парушэнні заканадаўства аб супрацьдзеянні экстрэмізму”, і што яно “выканана ў поўным аб’ёме”. Зараз доступ да архіўнай версіі сайта закрыты.

Беларуская асацыяцыя журналістаў канстатуе, што ў рэдакцыі дзяржаўнай раённай газеты за распаўсюд “экстрэмісцкіх матэрыялаў” ніхто не быў пакараны, “хоць вядомыя прэцэдэнты, калі ў падобных абставінах недзяржаўныя выданні штрафавалі на астранамічныя сумы”.

У 2021 годзе, прыводзіць прыклад БАЖ, дырэктар і галоўны рэдактар гарадскога партала hrodna.life Аляксей Шота быў пакараны штрафам у памеры 400 базавых велічынь (на той час 11,6 тыс. рублёў) як прадстаўнік арганізацыі і яшчэ 25 базавымі велічынямі (725 рублёў) як фізасоба за размяшчэнне ў трох матэрыялах спасылак або лагатыпа тэлеграм-канала, прызнанага “экстрэмісцкім”.

На сайтах беларускіх ведамстваў дагэтуль можна знайсці інтэрв’ю афіцыйных асоб tut.by з выкарыстаннем фота і лагатыпа партала. Аб супрацьдзеянні распаўсюджванню “экстрэмізму” ў гэтых выпадках не паведамляецца.

На інтэрнэт-партале МЗС Беларусі размешчана інтэрв’ю tut.by былога міністра Уладзіміра Макая (памёр у 2022 годзе) ад 2018 года, інтэрв’ю на той час начальніка галоўнага ўпраўлення шматбаковай дыпламатыі ведамства Юрыя Амбразевіча ад 2015 года, цяперашняга прэм’ер-міністра Рамана Галоўчанкі ад 2014 года, калі ён займаў пасаду пасла ў ААЭ.

На сайце Міністэрства інфармацыі, наўпрост датычнага да прызнання кантэнту незалежных СМІ “экстрэмісцкімі матэрыяламі”, апублікаванае інтэрв’ю tut.by на той момант намесніка міністра інфармацыі Паўла Лёгкага, захаваліся на сайце і фота з лагатыпам партала.

Інтэрв’ю tut.by дэпутата Палаты прадстаўнікоў Алега Гайдукевіча размешчана на афіцыйным сайце Ліберальна-дэмакратычнай партыі Беларусі, якую ён узначальвае.

Арт. 19.11 КаАП шырока выкарыстоўваецца ўладамі для ўзмацнення рэпрэсій у дачыненні да грамадзян Беларусі. Часцяком людзей караюць за рэпосты і запісы ў сацсетках са згадваннем цяпер “экстрэмісцкіх” СМІ шматгадовай даўнасці, калі яны яшчэ не былі ўключаныя ў спісы.

13 жніўня 2021 года суд Цэнтральнага раёна Минска паводле пазову Міністэрства ўнутраных спраў прызнаў “экстрэмісцкімі матэрыяламі” прадукцыю партала tut.by і звязанага з ім партала zerkalo.io (партал быў адкрыты 8 ліпеня 2021 года, праз паўтара месяца пасля разгрому tut.by і арышту яго супрацоўнікаў), іх старонкі ў сацсетках, месенджарах і тэлеграм-каналах, а таксама лагатыпы (лічбавыя вадзяныя знакі).

14 чэрвеня 2022 года кампанія “ТУТ БАЙ медыя”, якая валодала сайтам tut.by, была прызнаная ў Беларусі “экстрэмісцкай арганізацыяй”. Эканамічны суд Мінска пастанавіў ліквідаваць яе і забараніць выкарыстанне сімволікі і атрыбутыкі выдання.