ДПК паведаміў аб чацвёртым за жнівень затрыманні карыстальнікаў беспілотнікаў
19 жніўня, Позірк. Двое мужчын затрымана 17 жніўня за парушэнне памежнага рэжыму каля вёскі Сабаляны Гродзенскага раёна. Яны “планавалі ажыццявіць супрацьпраўную дзейнасць на беларуска-літоўскай мяжы”, паведамляе Дзяржаўны памежны камітэт (ДПК).
Вайскоўцы выявілі аўтамабіль, на якім затрыманыя прыехалі ў памежную зону. У ім знаходзіліся “беспілотнік самалётнага тыпу з пультам кіравання, ноўтбук, бензагенератар, кампрэсар і таварна-матэрыяльныя каштоўнасці”.
Супраць правапарушальнікаў распачаты адміністрацыйны працэс паводле ч. 1 арт. 24.19 КаАП (парушэнне памежнага рэжыму).
Гэта ўжо чацвёрты выпадак затрымання ўладальнікаў беспілотнікаў у жніўні.
Раней ДПК паведаміў, што лідскія памежнікі 15 жніўня ў раёне аграгарадка Азёры Гродзенскай вобласці затрымалі жыхара абласнога цэнтра “з БПЛА саматужнай вытворчасці з пультам дыстанцыйнага кіравання”.
Падобныя выпадкі былі зафіксаваныя таксама 2 і 13 жніўня.
1 красавіка ўступіў у сілу ўказ ад 25 верасня 2023 года № 297 “Аб дзяржаўным уліку і эксплуатацыі грамадзянскіх беспілотных лятальных апаратаў”, якім забараняецца ўвоз, захоўванне, абарот, эксплуатацыя і выраб беспілотнікаў і выкарыстанне паветранай прасторы без належнага дазволу.
Акрамя таго, незаконнае ўтрыманне і выкарыстанне беспілотнікаў у памежнай зоне альбо памежнай паласе з’яўляюцца парушэннем памежнага рэжыму і цягнуць адміністрацыйную адказнасць.
