21 жніўня, Позірк. Беларускі магазін Swed House, які пазіцыянуе сябе як аналаг ІКЕА, імкнучыся назваць свае тавары паводле ўзору згаданай сеткі, спыніўся на “нечаканых варыянтах”, піша шведскае выданне Göteborgs-Posten.
Паводле яго сцвярджэння, у асартымент дзіцячых тавараў і мяккіх цацак цяпер уваходзяць (у перакладзе са шведскага) кракадзіл Востры (Kryddig) (па-руску Пряный), кіт Дрэнны (Dålig), пінгвін Брудны (Smutsig), трус Замежны (Utländsk), васьміног Цяжкі (Svår) і іншыя дзіўныя тавары.
Выданне адзначае, што пакуль незразумела, ці ёсць у ІКЕА, якая прадае аналагічныя тавары пад іншымі назвамі, пазіцыя па згаданым пытанні і ці збіраецца яна падаваць судовыя пазовы.
Яно прыводзіць словы старэйшага дарадцы ў пытаннях аўтарскіх правоў шведскага патэнтна-рэгістрацыйнага бюро Петара Хедзіна, які мяркуе, што “калі кампанія не крадзе чужую гандлёвую марку, то пацярпелай кампаніі мала што можна зрабіць”.
Брэнд Swed House належыць беларускай кампаніі “Мердэм”, якая раней пастаўляла гаспадарчыя тавары, але ў 2022 годзе канцэпцыя памянялася, і яна вырашыла заняць месцаIKEA, якая пакінула Расію і Беларусь.
У Беларусі магазіны кампаніі працуюць у Бабруйску, Мінску, Магілёве, Маладзечне і Наваполацку.
Падчас разгляду кадравых пытанняў 12 снежня 2022 года Аляксандр Лукашэнка заявіў, што яго патрабаванне аб нацыяналізацыі замежных прадпрыемстваў, чые ўласнікі сышлі з беларускага рынку, распаўсюджваецца ў тым ліку на вытворчасці міжнароднай кампаніі ІКЕА.
“Ах, ІКЕА!.. Да пабачэння! Мы гэтыя табурэткі, крэслы і іншае зробім. Або дэталі для ложкаў. Яны ж у асноўным дэталі для кухні, для ложкаў, мэблі рабілі. Што, мы не можам зрабіць? Тым больш яны ж нічога не забралі і людзі засталіся, — цытавала Лукашэнку яго прэс-служба. — Пайшоў гаспадар — ну і ідзі. На рынку попыт прыстойны, на тым жа рынку ў Расіі, Беларусі і гэтак далей мы можам вырабляць гэтыя дэталі і ім пастаўляць, як пастаўлялі”.
Пра планы сысці з Беларусі ўслед за РФ (пасля пачатку поўнамаштабнай вайны з Украінай) ІКЕА заявіла ў сакавіку 2022 года. Літоўскі холдынг VMG Group, які інвеставаў у дрэваапрацоўчую прамысловасць у партнёрстве з ІКЕА, прыпыніў дзейнасць у краіне ў чэрвені таго ж года.
У апублікаваным у лістападзе 2022 года расследаванні нямецкай газеты taz і французскага анлайн-выдання Disclose сцвярджаецца, што пастаўшчыкі раздробнай сеткі з Беларусі (тэкстыльнае прадпрыемства “Магатэкс”, мэблевае “Івацэвічыдрэў”, холдынг арганізацый дрэваапрацоўчай прамысловасці Borwood (штаб-кватэра ў Мінску), куды ўваходзяць прадпрыемствы “БР-Вуд” (Бабруйск), “БР-Форэст” (Барысаў), “Віцебскдрэў”, выкарыстоўваюць працу зняволеных.
У адказе на запыт “Позірку” (тады BPN) ІКЕА не прызнала выкарыстанне працы беларускіх зняволеных.
Нідэрландская кампанія, заснаваная ў Швецыі ў 1943 годзе, ІКЕА прыйшла на беларускі рынак у 1999 годзе, а ў 2007-м у Нідэрландах адкрылася фірма Ingka Belarus BV (Ingka — юрыдычная назва ІКЕА, паводле імя заснавальніка Інгвара Кампрада). Закупкі ў Беларусі выраслі са 130 млн еўра ў 2018 годзе да 300 млн — у 2021-м.
Аўтарызавацца
Забыліся пароль?
Выхад з профілю
