Апублікавана на адкрытай версіі “Позірку” 25 жніўня 2024 года ў 14:19
25 жніўня, Позірк. У адной з бальніц Пінска (Брэсцкая вобласць) памерла праваабаронца Вераніка Іванова, паведамілі “Позірку” яе знаёмыя.
Прычына смерці невядомая. Паводле звестак крыніц, апошнім часам здароўе ў праваабаронцы пагоршылася, яна хварэла і неаднаразова была шпіталізаваная.
“На гэта, безумоўна, паўплываў і стрэс, звязаны з сённяшняй сітуацыяй у краіне”, — адзначыў суразмоўца “Позірка”.
Вераніка Іванова — праваабаронца, юрыст, лідар Пінскай рэгіянальнай арганізацыі Беларускай сацыял-дэмакратычнай партыі (Грамада). Маці траіх дзяцей.
У 2020 годзе аказвала прававую дапамогу ўдзельнікам акцый пратэсту ў Пінску, кансультавала, пісала скаргі. Неаднаразова была затрыманая і асуджаная паводле артыкула 23.34 КаАП за “ўдзел у несанкцыянаваных масавых мерапрыемствах”.
