16 верасня, Позірк. Аляксандр Лукашэнка падпісаў указ аб памілаванні яшчэ 37 чалавек, асуджаных за “злачынствы экстрэмісцкай накіраванасці”, паведамляе яго прэс-служба.
Паведамляецца, што памілаванне, якое прэс-служба называе “чарговым жэстам гуманізму з боку дзяржавы ў адносінах да тых, хто спатыкнуўся”, адбылося напярэдадні Дня народнага адзінства, які адзначаецца 17 верасня.
Сярод памілаваных — шэсць жанчын.
“Шэраг памілаваных маюць хранічныя захворванні, з’яўляюцца інвалідамі, пенсіянерамі. Усе яны раскаяліся і прасілі даць ім магчымасць вярнуцца на волю, весці законапаслухмяны лад жыцця”, — сцвярджае блізкі да Лукашэнкі тэлеграм-канал “Пул Первого”.
Адзначаецца, што хадайніцтвы асуджаных “дадаткова вывучаліся” камісіяй па вяртанні палітэмігрантаў, якую ўзначальвае Генеральны пракурор Андрэй Швед.
У пачатку ліпеня праваабаронцы паведамлялі аб выхадзе 18 палітвязняў, якое адбылося пасля заявы Лукашэнкі аб вызваленні яго “вельмі цяжкахворых” апанентаў.
Старшыня Вярхоўнага суда Валянцін Сукала паведаміў, што пасля згаданай заявы было вызвалена 14 чалавек. Сярод іх анкахворы Рыгор Кастусёў, а таксама Дар’я Лосік, Тамара Астрэйка, Святлана Лупач, Кацярына Мадзянкова і Паліна Палавінка.
16 жніўня Лукашэнка падпісаў указ аб памілаванні 30 асоб, асуджаных за злачынствы “пратэстнай накіраванасці”. Сярод памілаваных 14 жанчын і 16 мужчын, “некаторыя з іх маюць сур’ёзныя захворванні”, “ёсць асобы пенсійнага ўзросту”, гаварылася ў паведамленні прэс-службы Лукашэнкі.
Праваабаронцам было вядома пра 25 палітвязняў, якія выйшлі на волю па памілаванні ў межах жнівеньскага ўказу. Названы імёны 15 з іх: Ксенія Луцкіна, Ірына Санкоўская, Васіль Бераснеў, Наталля Пятровіч, Вольга Новікава, Ала Зуева, Вольга Страбоўская, Кацярына Леў, Тамара Каравай, Святлана Паўэктава, Яўген Чуміла, Павел Кучынскі, Руслан Красоў, Аляксандр Галуза, Алег Зыкун.
4 верасня 7 жанчын і 23 мужчыны, “асуджаныя за злачынствы пратэстнай накіраванасці”, былі памілаваны ў адпаведнасці з указам № 343, паведаміла напярэдадні прэс-служба Лукашэнкі. Большасць з іх — бацькі непаўналетніх і малалетніх дзяцей.
Памілаваныя былі пазбаўленыя волі за каментары ў інтэрнэце, вынікае са слоў Шведа.
Такім чынам, гэтае чацвёртае групавое памілаванне палітвязняў з пачатку ліпеня.
Паводле звестак праваабарончага цэнтра “Вясна”, у Беларусі зараз 1.342 палітычныя зняволеныя.
