Названыя прозвішчы 27 палітвязняў, памілаваных 16 верасня

18 верасня, Позірк. На волю па памілаванні выйшаў палітвязень Сяргей Мардзіловіч, паведамляе праваабарончы цэнтр “Вясна”.

Мужчына працаваў менеджарам па міжнародных перавозках кампаніі “Трансглабал”, мае двух дзяцей. Быў затрыманы ў кастрычніку 2022 года і абвінавачаны паводле трох артыкулаў Крымінальнага кодэкса: ч. 1 арт. 368 (абраза прэзідэнта), арт. 391 (абраза суддзі або народнага засядацеля), арт. 369 (абраза прадстаўніка ўлады).

Паводле версіі абвінавачвання, Мардзіловіч каментаваў паведамленні больш чым у 30 групах у сацсетках і нібыта пакінуў 43 тыс. запісаў.

Акрамя таго, сцвярджалася, што ён перадаў персанальныя даныя свайго былога аднакласніка-сілавіка праекту “Чорная кніга Беларусі”. Аднак, як вынікае са звестак праваабаронцаў, адпаведнае абвінавачванне яму выстаўленае не было.

Суд над Мардзіловічам пачаўся 31 жніўня 2023 года. Прыгавор праваабаронцам невядомы.

18 верасня таксама стала вядома, што на волю выйшаў былы журналіст Андрэй Толчын.

16 верасня ўказам Аляксандра Лукашэнкі было памілавана 37 чалавек. Прозвішчы пяці вызваленых у той жа дзень паведаміў у сваім тэлеграм-канале былы апазіцыйны блогер, а цяпер прапагандыст Раман Пратасевіч. Паводле яго слоў, гэта Аляксандр Фікаў, Таццяна Біруля, Анжэла Сікорская, Міхаіл Корзун і Кацярына Джыг.

17 верасня Пратасевіч назваў яшчэ 10 прозвішчаў. На волю выйшлі Аляксандр Емяльянаў, Ігар Барысаў, Аляксандр Пастэрняк, Уладзіслаў Папоў, Аляксандр Жандораў, Сяргей Мацюхевіч, Яўген Нарэйка, Андрэй Астрацоў, Віталь Чарнавусаў і Зоя Баранава.

У гэты ж дзень “Вясна” паведаміла аб вызваленні яшчэ 10 чалавек: Аляксандра Рукойця, Аляксандра Пугача, Дзмітрыя Кушалевіча, Алега Завадскага, Аляксандра Жука, Мікалая Амельчанкі, Дзмітрыя Сінюты, Сяргея Мазаля, Віталя Санько, Андрэя Рамановіча.

Усяго цяпер названыя прозвішчы 27 вызваленых з 37.

16 жніўня Лукашэнка падпісаў указ аб памілаванні 30 асоб, асуджаных за злачынствы “пратэстнай накіраванасці”. У ліку памілаваных 14 жанчын і 16 мужчын, “некаторыя з іх маюць сур’ёзныя захворванні”, “ёсць асобы пенсійнага ўзросту”, гаварылася ў паведамленні прэс-службы Лукашэнкі.

4 верасня 7 жанчын і 23 мужчыны, “асуджаныя за злачынствы пратэстнай накіраванасці”, былі памілаваныя ў адпаведнасці з указам № 343, паведаміла напярэдадні прэс-служба Лукашэнкі. Большасць з іх — бацькі непаўналетніх і малалетніх дзяцей.