Беларускую эканоміку чакае “павольнае астыванне” — BEROC
18 верасня, Позірк. Галоўным фактарам істотнага зніжэння валавога ўнутранага прадукту Беларусі ў жніўні з’яўляецца “карэкцыя ў сельскай гаспадарцы праз нераўнамернасць уборкі збожжа”, заявіў старшы навуковы супрацоўнік даследчага цэнтра BEROC Анатоль Харытончык на брыфінгу 18 верасня.
Акрамя гэтага, паводле яго слоў, на зніжэнне ВУП паўплывала “меншая колькасць працоўных дзён у жніўні гэтага года ў параўнанні з мінулым”.
Адбіўся і “часовы фактар — скарачэнне нафтаперапрацоўкі, звязаны з наступствамі ліпеньскага ўрагану”, сказаў эксперт.
Харытончык падкрэсліў, што “эканоміцы вельмі цяжка захоўваць высокія тэмпы росту праз адсутнасць свабодных магутнасцяў, дэфіцыту кадраў, ускладненай лагістыкі паставак і празмернага ўмяшання дзяржавы”.
“Упартае падтрыманне эканамічнай палітыкі залішне мяккай не будзе спрыяць вырашэнню рэсурсных абмежаванняў, але будзе падтрымліваць сур’ёзны маштаб перагрэву эканомікі”, — лічыць Харытончык.
Ён прагназуе беларускай эканоміцы “павольнае астыванне” пры адсутнасці моцных знешніх шокаў і чаканым запаволенні эканомікі РФ.
“Гэтаму будзе адпавядаць прырост ВУП у дыяпазоне 4–5% па выніках бягучага года і яго запаволенне ў дыяпазоне 0–2% у 2025 годзе”, — сказаў прадстаўнік BEROC.
