Праваабаронцы прызналі палітвязнямі яшчэ пяць чалавек — іх пераследуюць за выказванні пра Лукашэнку

24 верасня, Позірк. Яшчэ пяць чалавек прызнана ў Беларусі палітычнымі зняволенымі, цяпер іх 1.324, паведамляе праваабарончы цэнтр “Вясна”.

Статус палітвязня атрымаў Раман Гралеўскі, які змешчаны пад варту паводле арт. 368 (абраза прэзідэнта) і арт. 369 (абраза службовай асобы) Крымінальнага кодэкса.

Палітвязнямі прызнаныя асуджаныя паводле арт. 367 КК (паклёп у дачыненні да прэзідэнта) Сяргей Козікаў (пазбаўлены волі на 1,5 года) і Аляксандр Зубкоў (2 гады), а таксама Аляксандр Сацюк (арт. 368 і 369 КК, тэрмін невядомы) і Сяргей Паспелаў (1,5 года зняволення паводле арт. 368).

Праваабаронцы патрабуюць неадкладнага вызвалення ўсіх палітвязняў і спынення рэпрэсій супраць грамадзян краіны.

Адпаведную заяву, акрамя “Вясны”, падпісалі “Прававая ініцыятыва”, Lawtrend, Human Constanta, Беларускі Хельсінкскі камітэт.