30 верасня, Позірк. Былы палітвязень Руслан Акостка эвакуіраваны з Беларусі, паведамляе сузаснавальнік фонду салідарнасці BySol Андрэй Стрыжак у сваім тэлеграм-канале.
Цяпер ён знаходзіцца ў бяспецы.
Жыхар Салігорскага раёна (Мінская вобласць) былы дэсантнік Акостка стаў вядомы ў 2020 годзе, пасля таго як 15 лістапада прайшоў амаль праз увесь Салігорск з бел-чырвона-белым сцягам. Сваю акцыю ён прысвяціў памяці мінчука Рамана Бандарэнкі, які памёр пасля збіцця сілавікамі.
Акостка быў затрыманы ў той жа дзень. Спачатку суд Салігорскага раёна арыштаваў мужчыну на 15 сутак. Па заканчэнні гэтага тэрміну ён свабоду не выйшаў, на яго завялі крымінальную справу за “супраціў супрацоўніку міліцыі падчас аховы парадку” (арт. 363 КК).
Суд Салігорскага раёна (суддзя Алеся Серадзенка) прысудзіў яго да трох гадоў пазбаўлення волі ў калоніі ва ўмовах агульнага рэжыму.
У красавіку 2022 года Акостка асудзілі яшчэ на год пазбаўлення волі паводле арт. 411 КК (злоснае непадпарадкаванне патрабаванням адміністрацыі папраўчай установы).
Выйшаў на волю 24 ліпеня 2024 года.
