У Ваеннай акадэміі хочуць стварыць кафедру падрыхтоўкі аператараў БПЛА
7 кастрычніка, Позірк. Падрыхтоўку аператараў беспілотных лятальных апаратаў (БПЛА), у тым ліку стварэнне спецыялізаванай кафедры ў Ваеннай акадэміі Беларусі, абмеркавалі 7 кастрычніка на арганізаванай Мінабароны нарадзе з рэктарамі ўстаноў вышэйшай адукацыі, паведамляе ведамства.
Падрыхтоўка аператараў БПЛА запушчана ў праўладным ДТСААФ, створаны спецыяльны клас у Мінскім сувораўскім ваенным вучылішчы, аналагічны клас з’явіцца на ваенным факультэце БДУІР, вынікае са слоў міністра Віктара Хрэніна.
Курсанты ваенных факультэтаў навучаюцца ў 927-м цэнтры падрыхтоўкі і прымянення беспілотных авіяцыйных комплексаў (Бяроза, Брэсцкая вобласць), дадаў ён.
Начальнік упраўлення ваеннай адукацыі Узброеных сіл Андрэй Клішэвіч прапанаваў варыянты арганізацыі навучання аператараў БПЛА ў ВНУ і падрыхтоўкі прафесарска-выкладчыцкага складу. Падрабязнасцяў Мінабароны не прыводзіць.
Паведамляецца, што на мерапрыемстве прысутнічалі дзяржсакратар Савета бяспекі Аляксандр Вальфовіч, міністр адукацыі Андрэй Іванец, рэктары ВНУ, начальнікі іх ваенных факультэтаў і кафедр.
29 верасня намеснік дырэктара па вучэбнай рабоце ДТСААФ Сяргей Петрусеў у эфіры тэлеканала СТБ паведаміў, што ў 2026 годзе ў ДТСААФ (Добраахвотнае таварыства садзейнічання арміі, авіяцыі і флоту) плануюць рыхтаваць аператараў беспілотных лятальных апаратаў для сілавых структур.
Паводле яго інфармацыі, у мінулым годзе адпаведны сертыфікат атрымалі амаль 700 чалавек.
Актывізацыя падрыхтоўкі аператараў дронаў адбываецца на фоне залётаў баявых БПЛА, якія пачасціліся, на тэрыторыю Беларусі. У ліпені, жніўні і верасні тэлеграм-канал “Беларускі Гаюн”, які спецыялізуецца на маніторынгу ваеннай сітуацыі, паведамляў аб мностве выпадкаў уварвання ў паветраную прастору Беларусі беспілотнікаў, якімі Расія атакуе Украіну.
У ноч на 3 кастрычніка на тэрыторыю Беларусі ў чарговы раз заляцеў расійскі БПЛА, дрон іранскай маркі “Шахед” упаў у Калінкавічах (Гомельская вобласць).
4 кастрычніка Аляксандр Лукашэнка прызнаў факты парушэння мяжы Беларусі баявымі беспілотнікамі і заявіў, што беларускі бок “шмат” збівае, не гледзячы на тое, украінскія яны ці расійскія.
Залёт БПЛА Лукашэнка патлумачыў нявопытнасцю тых, хто іх выкарыстоўвае, і адзначыў, што пасля ўздзеяння сродкаў радыёэлектроннай барацьбы беспілотнікі губляюць арыенцір.
