17 кастрычніка, Позірк. У горадзе Сакаляны Падляскага ваяводства (Польшча) недалёка ад мяжы з Беларуссю прызямліўся паветраны шар з прымацаванай да яго ўпакоўкай цыгарэт без акцызных марак, паведамляе Radio Zet.
Паветраны шар пераносіў 1.200 пачкаў цыгарэт, гаворыцца ў публікацыі. На месца інцыдэнту была выкліканая паліцыя.
Адзначаецца, што ў пачатку кастрычніка і ў верасні падобныя шары знаходзілі на тэрыторыі Падляскага ваяводства.
У сакавіку Памежная ахова Польшчы паведаміла пра спробы кантрабанды беларускіх цыгарэт з дапамогай паветраных шароў.
З Беларусі ў Літву з пачатку года заляцела больш за 600 паветраных шароў (метэазондаў) з кантрабанднымі цыгарэтамі, паведаміў агенцтву BNS прадстаўнік Службы аховы дзяржаўнай мяжы (САДМ) Гедрус Мішуціс.
Паводле яго слоў, памежнікамі было перахоплена больш за 70 шароў (каля 11,6%).
“Гэта не азначае, што ўсе неперахопленыя паветраныя шары дастаюцца кантрабандыстам. <…> Некаторыя з іх выбухаюць, падаюць”, — сказаў ён.
30 верасня паведамлялася, што САДМ ініцыюе папраўкі ў заканадаўства, каб атрымаць права ўжываць агнястрэльную зброю супраць невядомых аб’ектаў, якія залятаюць на тэрыторыю краіны па паветры.
