Суд у РФ прыгаварыў дваіх абвінавачаных у дыверсіі беларусаў да 12 гадоў зняволення

28 кастрычніка, Позірк. Маскоўскі абласны суд прыгаварыў грамадзян Беларусі Арцёма Брэсскага і Кірыла Басько да 12 гадоў пазбаўлення волі ва ўмовах строгага рэжыму паводле п. “б” ч. 2 арт. 281 КК РФ (дыверсія), паведамляе “Медыязона”.

Суд таксама цалкам задаволіў грамадзянскі іск ААТ “Расійскія чыгункі” і абавязаў фігурантаў справы пакрыць шкоду ў памеры 2.874.000 расійскіх рублёў (каля 30 тыс. долараў).

Ураджэнцаў Віцебска, якія прыехалі ў сталіцу РФ на заробкі, затрымалі ў Маскве ў снежні 2022 года. Спачатку іх абвінавацілі ў дробным хуліганстве і аштрафавалі за нецэнзурную лаянку ў грамадскім месцы. Пазней суд арыштаваў мужчын на падставе артыкула аб “наўмысным пашкоджанні маёмасці”, затым абвінавачанне перакваліфікавалі на “дыверсію”.

Паводле версіі следства, Басько і Брэсскі за ўзнагароджанне падпалілі электравоз у лакаматыўным дэпо “Арэхава-Зуева” — на замову нейкага чалавека, які прадставіўся Юрыем. Оперупаўнаважаны ФСБ Павел Памітун, які выступаў сведкам у судзе, сцвярджаў, што Юрый быў украінскім выведнікам, хоць сілавікі так і не высветлілі яго асобу і не патлумачылі, чаму палічылі яго ўкраінцам.