Амбасадар Кітая заявіў аб рэкордным тавараабароце з Беларуссю

1 лістапада, Позірк. У 2023 годзе аб’ём узаемнага гандлю Пекіна і Мінска дасягнуў 8,44 млрд долараў, павялічыўшыся ў параўнанні з 2022 годам на 67,3% і “ўсталяваўшы рэкорд”, паведаміў амбасадар Кітая Чжан Вэньчуань у інтэрв’ю “Эканамічнай газеце”.

Паводле дыпламата, Беларусь займае спрыяльнае эканоміка-геаграфічнае становішча, якое злучае Еўрапейскі саюз і Еўразійскі эканамічны саюз.

“Хоць Беларусь зараз сутыкаецца з некаторымі цяжкасцямі ў галіне знешніх абменаў і супрацоўніцтва, аднак “суседзяў не выбіраюць”. Колькі б перыпетый ні было пройдзена, добрасуседства, сяброўства і ўзаемавыгаднае супрацоўніцтва — гэта павеў часу і спадзяванне народаў”, — адзначыў амбасадар.

Пра тое, што паміж краінамі ў 2023 годзе дасягнуты “гістарычны максімум тавараабароту амаль у 8,5 млрд долараў, а беларускі экспарт у гэтую краіну вырас амаль на 30%”, заявіў кіраўнік Адміністрацыі прэзідэнта Дзмітрый Круты на сустрэчы з амбасадарам 16 кастрычніка.

Беларускі бок не публікуе даныя аб двухбаковым абароце з Кітаем з 2021 года. Тады ён склаў 5,85 млрд долараў (экспарт — 1,31 млрд, імпарт — 4,54), паведамляецца на сайце амбасады ў Пекіне.

Віншуючы 1 кастрычніка Сі Цзіньпіня з 75-годдзем утварэння КНР, Лукашэнка адзначыў, што “актыўнае ўзаемадзеянне Мінска і Пекіна абсалютна па ўсіх напрамках пацвярджае непахіснасць беларуска-кітайскага сяброўства і ў поўнай меры раскрывае патэнцыял усепагоднага і ўсебаковага стратэгічнага партнёрства”.

У гэты ж дзень, прымаючы даверчыя граматы паслоў замежных краін, сярод якіх быў Чжан Вэньчуань, Лукашэнка падкрэсліў, што “давернае супрацоўніцтва” знаходзіцца на “беспрэцэдэнтна высокім узроўні”.

Мінск узмацняе ўзаемадзеянне з Пекінам у ваеннай сферы.

10 кастрычніка паведамлялася, што хутка Беларусь наведае дэлегацыя Міністэрства грамадскай бяспекі КНР.

На сустрэчы з кітайскім амбасадарам міністр унутраных спраў Іван Кубракоў адзначыў, што на прынцыпах сяброўскіх адносін будуюцца зносіны прадстаўнікоў двух праваахоўных ведамстваў.

Сёлета 24 чэрвеня прэзідэнт Польшчы Анджэй Дуда абмеркаваў у Пекіне з лідэрам КНР крызіс на беларуска-польскай мяжы. Паводле слоў Дуды, “гібрыдная атака” (так ён назваў 3 гады спробы масавага пранікнення нелегалаў з трэціх краін з тэрыторыі Беларусі) на мяжы стала перашкодай для рэалізацыі кітайскай ініцыятывы “Пояс і шлях”.