У Гродна прывезлі кадэтаў з акупаванага Данецка

27 лістапада, Позірк. Генеральны консул Расіі ў Гродне Феадосій Уладышэўскі сустрэўся з кадэтамі з так званай “данецкай народнай рэспублікі”, вынікае з паведамлення генконсульства ў сацсетках.

Навучэнцы “Школы № 4 — Кадэцкага корпуса ім. А.У. Захарчанкі*” (г. Данецк)” наведалі “Рускі дом” у Гродне і “пагутарылі з расійскімі дыпламатамі, суайчыннікамі і журналістамі”. Гаворка ішла аб “няпростым жыцці ў рэгіёне, і дапамогі, якая яму аказваецца”, гаворыцца ў рэлізе.

Мэтай паездкі названа “ўмацаванне сувязей паміж моладдзю Беларусі і Данбаса”, яна арганізавана “грамадскімі і некамерцыйнымі арганізацыямі Саюзнай дзяржавы, расійскім дыпламатычным корпусам і Рассупрацоўніцтвам”.

Удзельнікі таксама сустрэліся з вучнямі Гродзенскага каледжа бізнесу і права.

Аб візіце кадэтаў з “ДНР” паведаміла расійскае прапагандысцкае агенцтва “Спутник” 22 лістапада.

“Рускі дом” — альтэрнатыўная назва Расійскіх цэнтраў навукі і культуры, якія дзейнічаюць у шэрагу краін, дэкларуючы мэты прасоўвання рускай мовы, расійскай навукі і культуры.

Яны працуюць як прадстаўніцтвы Федэральнага агенцтва па справах СНД, суайчыннікаў, якія пражываюць за мяжой, і па міжнародным гуманітарным супрацоўніцтве (Рассупрацоўніцтва)

Рассупрацоўніцтва называе сваёй місіяй “узмацненне гуманітарнага ўплыву Расіі ў свеце”. Арганізацыя прадстаўлена ў 62 краінах свету 73 прадстаўніцтвамі.

Прадстаўніцтвы займаюцца прапагандай палітыкі Крамля і распаўсюджваннем наратываў, якія апраўдваюць расійскую агрэсію ва Украіне.

У Беларусі дзейнічаюць чатыры “Рускія дамы” — у Гродне, Мінску, Брэсце і Гомелі.

*Ліквідаваны ў 2018 годзе кіраўнік “днр” Аляксандр Захарчанка.