Пагадненне з РФ аб гарантыях бяспекі дазволіць накіроўваць ва Украіну беларускія войскі — BelPol у Вашынгтоне
Прадстаўнік BelPol Мацвей Купрэйчык на слуханнях у Хельсінкскай камісіі ЗША
6 снежня, Позірк. Беларуска-расійскі дагавор аб гарантыях бяспекі ў рамках Саюзнай дзяржавы, які плануецца падпісаць падчас візіту ў Беларусь прэзідэнта Расіі Уладзіміра Пуціна 6 снежня на пасяджэнне Вышэйшага дзяржсавета СД, дазволіць Маскве размясціць на тэрыторыі Беларусі новыя ваенныя базы і кантынгенты войскаў. Акрамя таго, дамовай прадугледжваецца магчымасць адпраўкі беларускіх грамадзян на вайну з Украінай “для абароны тэрытарыяльнай цэласнасці Расіі”.
Такую заяву зрабіў публічны прадстаўнік арганізацыі былых супрацоўнікаў беларускіх сілавых структур BelPol Мацвей Купрэйчык 5 снежня ў Вашынгтоне на слуханнях Камісіі ЗША па бяспецы і супрацоўніцтве ў Еўропе (Хельсінкская камісія) “Роля Беларусі ў злачынствах Расіі”.
Як паведаміў Купрэйчык, у распараджэнні BelPol маецца мноства дакументаў, якія даказваюць, што рэжым Лукашэнкі павялічвае вайсковую падтрымку Расіі. Паводле яго даных, прадпрыемствы беларускага ВПК у 2023 годзе ажыццявілі пастаўкі ў Расію на 422 млн долараў ЗША, за 8 месяцаў 2024 года — на 459 млн.