Латушка: Дзеля захавання ўлады Лукашэнка будзе забяспечваць інтарэсы Расіі
11 снежня, Позірк. Аляксандр Лукашэнка не здольны “вырваць Беларусь з абдымкаў” прэзідэнта Расіі Уладзіміра Пуціна і “будзе забяспечваць ваенна-палітычныя інтарэсы Масквы” дзеля захавання сваёй улады, заявіў намеснік кіраўніка Аб’яднанага пераходнага кабінета (АПК), кіраўнік Народнага антыкрызіснага ўпраўлення (НАУ) Павел Латушка на чацвёртым пасяджэнні кансультацыйнай групы “Беларусь — ЕС”.
Пасяджэнне адбылося 11 снежня ў Бруселі, у ім удзельнічалі прадстаўнікі Еўрасаюза, АПК, Каардынацыйнай рады і, як паведамляецца, “беларускай грамадзянскай супольнасці”.
На думку Латушкі, Лукашэнка “канчаткова зрабіў выбар на карысць Расіі і не стане самастойным у знешняй палітыцы”, таму дыялог ЕС з ім немагчымы, бо ён “не здольны забяспечваць рэалізацыю дамоўленасцяў”.
“Лукашэнка ўжо не здольны вярнуцца ў 2019 год. Ён не адновіць незалежныя СМІ, апазіцыйныя партыі, НДА і не вызваліць усіх палітвязняў, не адменіць тысячы незаконных прысудаў, не верне сотні тысяч дэпартаваных з краіны беларусаў, не верне жыцці забітых і здароўе тых, хто прайшоў або цяпер праходзіць катаванні ў турмах”, — падкрэсліў Латушка.
“Гэта нерэальна! — дадаў ён. — Яму нанесена наймацнейшая псіхалагічная траўма ў 2020 годзе. Беларускі народ адмовіў яму ў падтрымцы, і страх паўтарэння 2020 года будзе вызначаць яго палітыку. Трэба цвяроза ацэньваць карціну таго, што адбываецца ў Беларусі. І я перакананы, што яна ніяк не спрыяе таму, каб змяняць стратэгію ў дачыненні да рэжыму”.
Выхадам з сітуацыі палітык лічыць “моцную, сістэмную і мэтанакіраваную <…> сярэднетэрміновую і доўгатэрміновую падтрымку беларускага грамадства”.
Латушка акцэнтаваў увагу на тым, што “найбольш цынічнай з боку дыктатара з’яўляецца спроба легітымізаваць свае дзеянні як ва ўнутранай, так і ў знешняй палітыцы праз імітацыю выбараў”.
“Мы стаім напярэдадні так званых выбараў, якія плануе арганізаваць Лукашэнка. Але інакш як фарсам гэты працэс мы назваць не можам. І гэты фарс не можа стаць падставай для перагляду палітыкі ў дачыненні да Лукашэнкі”, — падкрэсліў Латушка.
На пасяджэнні кансультацыйнай групы “Беларусь — ЕС” выступіла таксама дэмакратычны лідар, кіраўніца АПК Святлана Ціханоўская.
Пасяджэнне стала адным з мерапрыемстваў, якія праходзяць на гэтым тыдні ў межах Дзён Беларусі ў Бруселі.