Галоўны рэдактар “Медыязона. Беларусь” Бойка узнагароджаная літоўскай журналісцкай прэміяй “Надзея Свабоды”
Анастасія Бойка, Казіс Старкявічус (у цэнтры), кіраўнікі журналісцкіх арганізацый Літвы
13 снежня, Позірк. Галоўнаму рэдактару “Медыязона. Беларусь” Анастасіі Бойка прысуджаная літоўская прэмія “Надзея Свабоды”. Цырымонія ўзнагароджання адбылася 13 снежня ў Сейме Літвы ў рамках Форуму журналісцкіх арганізацый з краін Балтыі і пераследаваных журналістаў.
“Я хачу падзякаваць за гэтую ўзнагароду літоўскім калегам, — сказала Бойка на цырымоніі ўганаравання. — Вельмі прыемна, што маю працу і працу, я спадзяюся, “Медыязона. Беларусь” адзначылі ў гэты цяжкі час”.
“Калі мы працуем у эміграцыі, калі журналістыка стала амаль ананімнай, я ўсё ж хачу ўспрымаць гэтую прэмію не як сваю асабіста, а як прэмію для кожнага супрацоўніка “Медыязона. Беларусь”, кожнай і кожнага нашага журналіста, СММ-шчыка, рэдактара. Гэтыя людзі кожны дзень пішуць на вельмі складаныя тэмы, распавядаюць складаныя гісторыі, пішуць складаныя навіны”, — дадала яна.
Прэмія “Надзея Свабоды” заснаваная парламентарыем Казісам Старкявічусам і ўручаецца разам з літоўскімі журналісцкімі арганізацыямі.
У 2022 і 2023 гадах гэтую ўзнагароду атрымалі беларускія журналісты, былыя палітвязні Алег Груздзіловіч і Ягор Марціновіч адпаведна.
