Кандыдатаў на выбарах-2025 зарэгістравалі так хутка, як ніколі ў гісторыі прэзідэнцкіх кампаній — праваабаронцы

30 снежня, Позірк. Цэнтральная выбарчая камісія зарэгістравала пяць кандыдатаў на выбарах 2025 года так хутка, як ніколі ў гісторыі прэзідэнцкіх кампаній у Беларусі. Прэтэндэнты атрымалі пасведчанні кандыдатаў на наступны дзень пасля пачатку этапу рэгістрацыі, гаворыцца ў аналітычнай справаздачы кампаніі “Праваабаронцы за свабодныя выбары”.

Праваабаронцы канстатавалі, што праверка подпісаў, сабраных за вылучэнне людзей кандыдатамі на пасаду прэзідэнта, як і раней, адбывалася непразрыста і ў вельмі сціслыя тэрміны, што “выклікае абгрунтаваныя сумневы ў праўдзівасці агучаных лічбаў”.

“Часткай фактычна агітацыйнай кампаніі, закліканай легітымаваць ідэю шырокай падтрымкі выбаршчыкамі А. Лукашэнкі ўжо на гэтым этапе, з’яўляецца рэкордна высокая колькасць заяўленых подпісаў і розніца паміж нібыта сабранымі подпісамі ў яго падтрымку (больш за 2,5 млн подпісаў, каля 35% усіх выбаршчыкаў) і подпісамі, сабранымі іншымі кандыдатамі (у рамках 112–134 тысячы). Асаблівая роля была адведзена дзяржаўным і праўладным медыярэсурсам, асабліва раённым газетам, якія факусаваліся на фактычнай агітацыі за А. Лукашэнку”, — адзначаецца ў справаздачы.

Праваабаронцы нагадваюць, што “збор подпісаў у падтрымку кандыдатаў на прэзідэнцкіх выбарах у Беларусі 2025 года прайшоў з сур’ёзнымі парушэннямі стандартаў свабодных і дэмакратычных выбараў, у атмасферы запалохвання і прымусу”.

“Працэс збору подпісаў выключаў роўнасць кандыдатаў і быў скіраваны на забеспячэнне карцінкі падтрымкі толькі аднаго кандыдата, А. Лукашэнкі, з традыцыйным выкарыстаннем адміністрацыйнага рэсурсу і прымусу выбаршчыкаў да падпісання за яго вылучэнне кандыдатам”, — гаворыцца ў дакуменце.

23 снежня ЦВК абвясціў, што за вылучэнне Лукашэнкі сабрана 2.518.145 подпісаў, лідара праўладнай Ліберальна-дэмакратычнай партыі Алега Гайдукевіча — 134.472, старшыню Рэспубліканскай партыі працы і справядлівасці Сяргея Сыранкова — 125.577, былога члена Аб’яднанай грамадзянскай партыі, дэпутата Палаты прадстаўнікоў у 2016–2019 гадах, удзельніцу выбарчай кампаніі 2020 года Ганны Канапацкай — 121.077, кіраўніка Камуністычнай партыі Беларусі Аляксандра Хіжняка — 112.779.

Усе яны зарэгістраваныя ў якасці кандыдатаў на пасаду прэзідэнта.

Сёмыя прэзідэнцкія выбары ў Беларусі пройдуць 26 студзеня 2025 года.

Прэзідэнцкая кампанія праходзіць пад поўным кантролем уладаў. Палітычнае поле краіны цалкам зачышчана ад актыўных апанентаў Лукашэнкі. Прадстаўнікі беларускіх дэмакратычных сіл за мяжой называюць тое, што адбываецца, “спецаперацыяй па ўтрыманні ўлады”, праваабаронцы кажуць аб імітацыі канкурэнцыі.

З 1996 года ніводная выбарчая кампанія ў Беларусі не была прызнаная незалежнымі назіральнікамі транспарэнтнай і адпаведнай дэмакратычным стандартам.