Лукашэнка анансаваў стварэнне крыптавалюты ў Беларусі

26 студзеня, Позірк. Пасля выбараў улады падтрымаюць ІТ-галіну “па двух напрамках — штучнаму інтэлекту і крыптавалюце”, заявіў Аляксандр Лукашэнка 26 студзеня на прэс-канферэнцыі ў Мінску.

“Для нас гэта нармальна — весці разлікі ў “крыпце”, — сказаў ён. — Мы займаемся стварэннем крыптавалюты ў Беларусі. Лішкі электраэнергіі ёсць. Мы паспяхова гэта выкарыстоўваем. Але гэта пакуль закрытая тэма”.

Са спасылкай на “спецыялістаў” Лукашэнка заявіў, што “чалавецтва не ўмее кантраляваць і кіраваць штучным інтэлектам”, што можа прывесці да гібелі жыцця на зямлі.

Небяспека нейрасетак, паводле яго слоў, не толькі ў тым, што яны будуць “вяшчаць нечымі галасамі”, бо гэта “можна растлумачыць людзям”, але і ў наступствах, “раўнасільных вайне”.

“Мы цяпер гэтую тэму вывучаем, каб прыняць адпаведнае рашэнне. І калі нам трэба пайсці нейкім шляхам, то мы абярэм кітайскі — жорстка абараняючы сваю краіну [ў лічбавай сферы], — падкрэсліў Лукашэнка. — Калі амерыканцы інвестуюць паўтрыльёна долараў, думаючы, што яны, апярэдзіўшы ўсіх, нешта на гэтым атрымаюць, то яны могуць атрымаць зваротны эфект. Яны выпусцяць з клеткі гэтага звера, які ашчэрыцца супраць іх”.

Ён заявіў, што Беларусь у гэтай галіне знаходзіцца “пакуль на пачатковым шляху”, але будзе “ісці хутка”, адпаведная задача ўраду ўжо пастаўленая.

17 верасня 2024 года Лукашэнка падпісаў указ аб забароне на куплю і продаж крыптавалюты па-за беларускімі крыптабіржамі (крыптаабменнікамі).

Дзеянне дакумента распаўсюджваецца на “фізічных асоб, у тым ліку індывідуальных прадпрымальнікаў — рэзідэнтаў ПВТ”.

У Беларусі дзейнічае некалькі крыптабірж, створаных у асноўным пры падтрымцы Парка высокіх тэхналогій (ПВТ): Currency, Bynex, Free2ex, Whitebird і інш.

Пра намер абмеркаваць найбліжэйшым часам з прэзідэнтам РФ Уладзімірам Пуціным будаўніцтва другой АЭС у Беларусі заявіў Лукашэнка 21 студзеня падчас наведвання Мінскага аўтамабільнага завода.

“У нас сёння нават невялікі лішак электраэнергіі, — сказаў ён. — Але ў будучыні гэтага можа не хапіць. Таму мы ў бліжэйшы час абмяркуем з прэзідэнтам Расіі пытанне будаўніцтва другой атамнай станцыі на тэрыторыі Беларусі”.