Больш за 45% нелегальнага абароту цыгарэт у РФ прыпадае на прадукцыю з Беларусі — расійскі эксперт

28 студзеня, Позірк. Шляхам фіктыўных транзітных перавозак у Расію штогод паступае каля 600 млн пачкаў цыгарэт, больш за 45% такога нелегальнага абароту складае прадукцыя беларускага паходжання, паведамляе ТАСС са спасылкай на прэзідэнта Асацыяцыі малафарматнага гандлю Уладлена Максімава.

Пад фіктыўнымі транзітнымі перавозкамі ў гэтым кантэксце маюцца на ўвазе сітуацыі, калі тавар прызначаны для рэалізацыі ў іншых краінах, але разгружаецца ў Расіі.

Паводле ацэнкі Максімава, штогадовая шкода, які наносіцца бюджэту такімі схемамі, складае 58,5 млрд расійскіх рублёў (больш за 600 млн долараў паводле актуальнага курсу Цэнтрабанка РФ).

У матэрыяле адзначаецца, што ў мэтах скарачэння нелегальнага абароту 27 студзеня 2025 года набылі моц новыя патрабаванні па абавязковым выкарыстанні навігацыйных пломбаў для перавозак тытунёвай прадукцыі паміж Расіяй і Беларуссю. Гэта павінна дазволіць адсочваць дакладнае месцазнаходжанне партый тытунёвых вырабаў, фіксаваць спробы ўскрыцця ці змены маршруту.

Кантрабанда беларускіх тытунёвых вырабаў — адна з істотных праблем, з якой сутыкаюцца суседнія з Беларуссю краіны ЕС. Асабліва церпяць ад гэтага Літва, дзе памежнікі ў 2024 годзе перахапілі больш за 1 млн 386 тыс. пачкаў цыгарэт, і Польшча, на тэрыторыі якой рэгулярна затрымліваюцца ўдзельнікі кантрабандных схем.