Сотавай сувяззю стандарту LTE у 2024 годзе было ахоплена 99% жыхароў Беларусі — Мінсувязі

7 лютага, Позірк. На пачатак 2025 года ў Беларусі было 11 млн 875 тыс. абанентаў сотавай рухомай электрасувязі — на 118 тыс. больш, чым годам раней. На 100 жыхароў прыпадае 129,7 абанента (+2,5%), вынікае са справаздачы Міністэрства сувязі і інфарматызацыі аб развіцці інфармацыйна-камунікацыйнай інфраструктуры.

Паводле інфармацыі ведамства, у 2024 годзе ахоп жыхароў краіны паслугамі сотавай сувязі стандарта LTE склаў 99% (98%).

Шырыня знешняга канала для доступу ў сетку летась была павялічаная на 590 Гбіт/с і на 1 студзеня 2025-га склала 4.220 Гбіт/с (3.630).

Летась, паводле даных Мінсувязі, абанентаў працягвалі падключаць з прымяненнем тэхналогіі пасіўных аптычных сетак (GPON), якая дазваляе забяспечыць хуткасць перадачы даных ад 100 Мбіт/с і вышэй. На пачатак гэтага года колькасць карыстальнікаў сістэмай вырасла на 99,3 тыс. — да 3 млн 52,9 тыс. (2 млн 953,6 тыс.).

Агульная колькасць абанентаў стацыянарнага шырокапалоснага доступу да інтэрнэту склала 3 млн 291,7 тыс. (3 млн 209,2 тыс.).

Гл. таксама:

Краіна ў рэжыме інкамунікада. Як інтэрнэт стаў закладнікам улады і як вырвацца з блакады (на рускай мове)