Вярхоўны суд не змяніў прыгавор журналістцы, пазбаўленай волі за супрацоўніцтва з нямецкім СМІ

10 лютага, Позірк. Вярхоўны суд 7 лютага не змяніў вынесены летась 10 снежня прыгавор журналістцы Вользе Радзівонавай: 4 гады пазбаўлення волі за “наданне замежнаму СМІ для артыкулаў звестак экстрэмісцкага характару”, паведаміла Беларуская асацыяцыя журналістаў.

Паводле сцвярджэння Генеральнай пракуратуры, Радзівонава “з мэтай атрымання грашовай узнагароды падрыхтавала і надала замежнаму СМІ — прадстаўнікам нямецкай штодзённай газеты Die Tageszeitung — шэраг артыкулаў з выказваннямі, накіраванымі на ўзбуджэнне нацыянальнай і сацыяльнай варожасці і варожасці, дыскрэдытацыю рэспублікі, а таксама паклёп і абразы ў дачыненні да кіраўніка дзяржавы”.

“Артыкулы Радзівонавай апублікаваныя ў вольным доступе для ўсеагульнага агляду на старонцы інтэрнэт-рэсурсу названай штодзённай газеты“, — падкрэслівала пракуратура.

Акрамя таго, паведамляла нагляднае ведамства, з Радзівонавай, паводле пастановы суда “спагнаны даход, атрыманы злачынным шляхам“, гэта значыць ганарары за артыкулы. Паводле прысуду яна была аштрафаваная на 100 базавых велічынь (4 тыс. рублёў).

Радзівонава абвінавачвалася паводле ч. 1 арт. 130 (распальванне расавай, нацыянальнай, рэлігійнай альбо іншай сацыяльнай варожасці або варажнечы), ч. 1 і 2 арт. 367 (паклёп у дачыненні да прэзідэнта), ч. 1 арт. 368 (абраза прэзідэнта) і арт. 369¹ (дыскрэдытацыя Рэспублікі Беларусь) Крымінальнага кодэкса.

Журналістку затрымалі 7 сакавіка 2024 года. У перыяд утрымання ў следчым ізалятары яе адпраўлялі на псіхіятрычную экспертызу.

Маці асуджанай больш за 80 гадоў, яна мае патрэбу ў пастаянным доглядзе.

Да 2020 года Радзівонава працавала ў інтэрнэт-выданні KYKY.org, як фрылансер супрацоўнічала з беларускімі і замежнымі СМІ.

31 кастрычніка 2024 года праваабарончая супольнасць прызнала Радзівонаву палітзняволенай.

Паводле звестак Беларускай асацыяцыі журналістаў (на радзіме ліквідаваная, працягвае дзейнасць за мяжой), у зняволенні ўтрымліваецца 41 супрацоўнік СМІ.