У студзені МАЗ прадаў у РФ амаль на траціну менш новых грузавікоў, чым год таму

14 лютага, Позірк. У студзені 2025 года на расійскім рынку было прададзена 274 новыя грузавікі Мінскага аўтамабільнага завода — на 32,3% менш, чым у тым жа месяцы 2024-га (405), гаворыцца ў даследаванні “АСМ-холдынг” (РФ).

Прадукцыя Мінскага аўтазавода ў студзені, як і месяцам раней, заняла 6-е месца ў спісе самых прадаваных брэндаў гэтага сегмента аўтарынку Расіі, канстатавалі эксперты. Доля на рынку склала 4,8% (4,6%).

Лідарамі продажаў у першым месяцы 2025 года сталі: КамАЗ — 1.438 (0,7% да студзеня 2024-га), SITRAK — 1.089 (-27,6%), Shacman — 501 (-45,4%), FAW — 425 (-37,1%), ГАЗ — 397 (-11,2%).

За мінулы год беларускае прадпрыемства рэалізавала ў РФ 5.719 адзінак грузавікоў (за 2023 год — 6.406; -10,7%).

Пяцёрка лідараў продажаў па выніках 2024 года: КамАЗ (23.121; -26,5% да ўзроўню продажаў 2023-га), SITRAK (19.376; -19,2%), Shacman (15.545; -25,6%), FAW (11.680; -26,3%), Dongfeng (9.990; рост у 2,1 раза).

На нарадзе па развіцці прамысловасці 9 красавіка 2024 года Аляксандр Лукашэнка заявіў, што “айчынная прадукцыя саступае аналагам як у цане, так і ў якасці”. “Доля нашых грузавых аўтамабіляў [на расійскім рынку] знізілася — да 6%”, — звярнуў увагу ён.

Лукашэнка таксама адзначыў, што пры рэалізацыі ў РФ паводле схемы “вытворца — генеральны імпарцёр — дыстрыбутар — дылер — канчатковы спажывец” кошт грузавой і пасажырскай тэхнікі МАЗа ўзрастае — на 20%.

15 чэрвеня 2023 года першы віцэ-прэм’ер Беларусі Мікалай Снапкоў заявіў, што рынак аўтатэхнікі Саюзнай дзяржавы “мае патрэбу ў аператыўным прыняцці спецыяльных ахоўных мер праз актыўную экспансію кітайскіх вытворцаў”.

“Гаворка не проста пра падвышэнне імпартных пошлін, тут поля для манеўру амаль няма. Я маю на ўвазе антыдэмпінгавыя і спецабаронныя захады”, — сказаў Снапкоў.

Паводле яго слоў, экспансія ўсходніх партнёраў на беларускім і расійскім рынках аўтамабільнай грузавой тэхнікі відавочная, а дынаміка іх продажу палохае.