Лукашэнка абмеркаваў рост попыту на БПЛА і боепрыпасы з новым віцэ-прэм’ерам Каранкевічам

4 сакавіка, Позірк. Тэхніка для абароны і бяспекі становіцца ўсё больш запатрабаванай, заявіў Аляксандр Лукашэнка на нарадзе па кадравых пытаннях 4 сакавіка, звяртаючыся да новапрызначанага намесніка прэм’ер-міністра Віктара Каранкевіча, які будзе курыраваць прамысловы сектар.

Лукашэнка, якога цытуе яго прэс-служба, адзначыў, што Каранкевічу “трэба смялей паглыбляцца ў гэтую сферу і кіраваць ёй”, як і той сферай, у якую ён “добра быў пагружаны — электраэнергетыку”.

“Дыверсіфікацыя, нарошчванне экспарту, у тым ліку ў краіны “далёкай дугі”, — гэта найважнейшае пытанне для Дзяржкамваенпрама”, — заявіў Лукашэнка. Ён паведаміў пра планы наведаць выставу беспілотных лятальных апаратаў. Пра якую выставу ідзе гаворка, сказана не было. 21—24 траўня ў Мінску пройдзе XII Міжнародная выстава ўзбраенняў і ваеннай тэхнікі MILEX.

“У сябе трэба актыўней разварочвацца. Попыт вялікі. Ну, а таксама на боепрыпасы”, — адзначыў Лукашэнка.

Звяртаючыся да старшыні канцэрна “Беллесбумпрам” Аляксандра Пшэннага, Лукашэнка зноў закрануў тэму вытворчасці пелет: “У нас вельмі шмат у лесе ўсякага хламу. Мы дамовіліся: пелеты і яшчэ раз пелеты. Гэта — паліва. Мы абнаглелі да крайняй ступені: танны прыродны газ — таму дровы і іншае нам не патрэбныя. Не ведаю, як зараз сітуацыя ў вас з гэтымі пелетамі, але гэта ваша найважнейшая праблема. Мы ж пабудавалі сем ці восем заводаў у мінулым годзе, каб перапрацоўваць гэты смецце, хлам, якога ў лесе дастаткова, і рабіць цудоўны тавар”.

“Шукайце іншыя рынкі, акрамя Еўропы. Ды і Еўропа нікуды не дзенецца”, — лічыць Лукашэнка.

У Беларусі назіраецца актывізацыя падрыхтоўкі аператараў дронаў, якая адбываецца на фоне ўсё часцейшых залётаў расійскіх баявых БПЛА ў беларускую паветраную прастору.

Даведкі “Позірку”:

24 верасня 2024 года на нарадзе з вайскоўцамі на Абуз-Лясноўскім агульнавайсковым палігоне (Брэсцкая вобласць) Лукашэнка заявіў пра неабходнасць рыхтавацца да вайны. Беспілотную авіяцыю пры гэтым ён назваў “сур’ёзнай навінкай”.

29 верасня намеснік дырэктара па вучэбнай працы ДТСААФ Сяргей Петрусёў паведаміў, што ў 2026 годзе ў ДТСААФ (Добраахвотнае таварыства садзейнічання арміі, авіяцыі і флоту) плануюць рыхтаваць аператараў БПЛА для сілавых структур.

7 кастрычніка на арганізаванай Міністэрствам абароны нарадзе з рэктарамі ўстаноў вышэйшай адукацыі абмяркоўвалася падрыхтоўка аператараў беспілотных лятальных апаратаў, у тым ліку стварэнне спецыялізаванай кафедры ў Ваеннай акадэміі.

15 лістапада начальнік упраўлення прымянення і развіцця беспілотных авіяцыйных комплексаў Узброеных сіл Міхаіл Бранскі сцвярджаў, што ў Беларусі “паспяхова вырашылі праблему з ударнымі БПЛА”. Паводле яго слоў, у 2024 годзе Узброеныя сілы “шчыльна працавалі” з прадпрыемствамі Дзяржкамваенпрама, значная колькасць узораў, якія распрацоўваюцца па заказе войска беларускімі прадпрыемствамі, “ужо прынятая на ўзбраенне”.

Паведамлялася, што па выніках праведзеных выпрабаванняў у 2025 годзе УС будуць мець “шырокую лінейку ўдарных беспілотнікаў”: “Чэкан-В” з дальнасцю палёту да 30 кіламетраў, “Міратворац” і іншыя распрацоўкі.

30 снежня Лукашэнка падпісаў указ № 475 “Аб кампенсацыі выдаткаў на набыццё кацельнага абсталявання, што працуе на драўняных паліўных гранулах (пелетах)”.

Дакумент быў прыняты “з мэтай павелічэння выкарыстання пелет насельніцтвам і прадугледжвае кампенсацыю 40% выдаткаў грамадзян (але не больш за 120 базавых велічынь, у 2025 годзе гэта 5.040 рублёў) на набыццё адпаведнага кацельнага абсталявання, вырабленага прадпрыемствамі Беларусі і арганізацыямі дзяржаў — членаў Еўразійскага эканамічнага саюза”.