Брэсцкі акумулятарны завод прыпыняе працу да 12 траўня — СМІ

7 красавіка, Позірк. Брэсцкі акумулятарны завод прыпыніць працу да 12 траўня, паведамляе выданне “Еўрарадыё”.

Таксама на прадпрыемстве плануецца скараціць штат супрацоўнікаў.

Прычыны не ўдакладняюцца.

Завод вырабляе акумулятарныя батарэі, батарэі для крыніц бесперабойнага сілкавання і сістэм назапашвання энергіі. З красавіка 2020 года з’яўляецца рэзідэнтам свабоднай эканамічнай зоны “Брэст”.

Завод па вытворчасці акумулятараў будавала кампанія 1AK-GROUP. Магчымае з’яўленне на ўскраіне горада бруднай вытворчасці выклікала пратэсты мясцовых жыхароў. У чэрвені 2019 года на ўзроўні старшыні Брэсцкага аблвыканкама было прынята рашэнне аб прыпыненні будаўніцтва з-за выяўленых парушэнняў. КДБ тады распачаў крымінальную справу ў дачыненні да ўладальніка кампаніі Віктара Лемяшэўскага. З-за таго, што завод не прайшоў экалагічную экспертызу і не быў запушчаны ў тэрмін у адпаведнасці з інвестдагаворам, аблвыканкам запатрабаваў вярнуць сродкі інвестыцыйнага фонду, выдзеленыя прадпрыемству.

У красавіку 2020 года было атрымана станоўчае заключэнне дзяржаўнай экалагічнай экспертызы па будаўнічым праекце. У траўні таго ж года завод быў прададзены ТАА “Акумулятарны альянс”, саўладальнікам якога з’яўляецца набліжаны да Аляксандра Лукашэнкі бізнесмен, былы кіраўнік Беларускай федэрацыі хакея, цяпер член Савета Рэспублікі Дзмітрый Баскаў.

У чэрвені 2020 года на перадвыбарнай сустрэчы з жыхарамі Брэста Лукашэнка паабяцаў правесці мясцовы рэферэндум наконт будаўніцтва завода, аднак у верасні таго ж года стала вядома, што рэферэндум праводзіцца не будзе.