МАРГ выявіў парушэнні ва ўсіх правераных аб’ектах гандлёвай сеткі “Святлафор”

28 ліпеня, Позірк. Пра вынікі маштабнай праверкі аб’ектаў рознічнай сеткі “Святлафор” 28 ліпеня адсправаздачылася Міністэрства антыманапольнага рэгулявання і гандлю (МАРГ).

Адзначаецца, што “кантрольна-аналітычныя мерапрыемствы” праведзены “ў шэрагу гарадоў краіны”, парушэнні выяўлены ва ўсіх правераных аб’ектах сеткі.

Колькасць правераных крамаў не паведамляецца.

Паводле даных ведамства, у Беларусі “функцыянуюць каля 190 гандлёвых аб’ектаў сеткі”. Найбольш распаўсюджанымі парушэннямі ў іх з’яўляюцца “невыкананне пераліку тавараў, абавязковых для наяўнасці ў рэалізацыі”; адсутнасць цэннікаў; “недавядзенне да ведама пакупнікоў неабходнай інфармацыі пра тавары, у тым ліку пра расфасаваныя ў краме”.

Таксама “ўстаноўлены факт рэалізацыі тавараў са скончанымі тэрмінамі прыдатнасці”.

Па выніках маніторынгу сетцы выдадзены рэкамендацыі аб ліквідацыі парушэнняў і прадпісанні аб забароне рэалізацыі прадукцыі.

Заяўляецца, што сетка “Святлафор” будзе прыцягнутая да адміністрацыйнай адказнасці.

1 чэрвеня паведамлялася пра парушэнне заканадаўства пры гандлі ў сеткавай інтэрнэт-краме “Пяты элемент”.

4 красавіка стала вядома, што ва ўсіх правераных магазінах рознічнай сеткі “7 пятніц” (належыць ТАА “ЮніСтор Груп”) выяўлены парушэнні заканадаўства аб гандлі і абароне правоў спажыўцоў.

10 сакавіка МАРГ паведаміў, што парушэнні правілаў гандлю ўстаноўлены амаль у кожнай трэцяй праверанай краме сеткі “Табакерка”, якая належыць СЗАТ “ЭНЕРГА-ОЙЛ”.

28 лютага МАРГ праінфармаваў пра парушэнні правілаў гандлю, устаноўленыя ва ўсіх правераных магазінах сеткі “Хіт!”, якая належыць ТАА “Еўрагандль”.

20 лютага ведамства ўказала на парушэнні ў 96% гандлёвых аб’ектаў рознічнай сеткі “Капеечка”.

Раней МАРГ прад’явіў маштабныя прэтэнзіі да інтэрнэт-пляцоўкі “Вайлдберыз” і гандлёвай сеткі “Суседзі”.