У ПАСЕ пройдуць слуханні па сітуацыі з палітвязнямі ў Беларусі і Расіі

7 красавіка, Позірк. На летняй сесіі Парламенцкай асамблеі Савета Еўропы (ПАСЕ) пройдуць публічныя слуханні па сітуацыі з палітычнымі зняволенымі ў Беларусі і Расіі, паведаміў намеснік кіраўніка Аб’яднанага пераходнага кабінета (АПК), кіраўнік Народнага антыкрызіснага ўпраўлення (НАУ) Павел Латушка.

7 красавіка ў якасці члена дэлегацыі Каардынацыйнай рады (КР) палітык выступіў у Страсбургу на пасяджэнні камітэта па прававых пытаннях і правах чалавека ПАСЕ ў рамках вясновай сесіі арганізацыі.

Адзначаецца, што ў сваім выступе Латушка “падтрымаў генеральнага дакладчыка ПАСЕ па пытаннях палітычных зняволеных Азадэ Райхан са Швецыі”, а таксама “адзначыў важнасць прыцягнення ўвагі міжнароднай супольнасці да пытанняў палітвязняў у Беларусі і масавага палітычна матываванага пераследу беларусаў з боку рэжыму Лукашэнкі”.

Палітык падкрэсліў “беспрэцэдэнтны за апошнія дзесяцігоддзі для Еўропы ўзровень рэпрэсій у Беларусі”.

Асаблівую ўвагу, як паведамляецца, ён звярнуў на “сітуацыю з палітычнымі зняволенымі, якія знаходзяцца ў статусе інкамунікада, прывёўшы ў прыклад Сяргея Ціханоўскага, Мікалая Статкевіча і многіх іншых”.

“Дэлегацыя КР у ПАСЕ гатовая супрацоўнічаць з генеральным дакладчыкам ПАСЕ па пытаннях палітычных зняволеных для прадастаўлення максімальна поўнай інфармацыі аб жахлівай сітуацыі з палітычна матываваным пераследам у Беларусі”, — заявіў Латушка.

Вясновая сесія ПАСЕ праходзіць 7–11 красавіка.

30 студзеня асамблея прыняла на сваёй зімовай сесіі рэзалюцыю “Настойлівая неабходнасць правядзення свабодных і справядлівых выбараў у Беларусі”. Прыняцце дакумента падтрымалі ўсе 79 членаў арганізацыі, якія прынялі ўдзел у галасаванні.

У працы асобных пасяджэнняў у рамках зімовай сесіі ПАСЕ, а таксама асноўнага пасяджэння, на якім абмяркоўвалася беларускае пытанне, прыняла ўдзел дэлегацыя КР.