Гарэцкі: БАЖ фіксуе выпадкі, калі пад выглядам журналістаў да людзей звяртаюцца трэція асобы
14 красавіка, Позірк. Маюцца выпадкі, калі пад выглядам журналістаў да людзей звяртаюцца трэція асобы, у тым ліку, не выключана, супрацоўнікі беларускіх спецслужбаў, заявіў “Позірку“ намеснік старшыні Беларускай асацыяцыі журналістаў (БАЖ) Барыс Гарэцкі.
Паводле яго слоў, БАЖ вядомыя такія выпадкі, але яны “не носяць масавы характар”.
Гарэцкі рэкамендаваў “не даваць інфармацыю асобе, у сапраўднасці якой вы не ўпэўненыя”.
Пра спробы, як сцвярджаецца, прадстаўнікоў сілавых структур Беларусі выдаць сябе за іншых людзей, каб выявіць апанентаў рэжыму Аляксандра Лукашэнкі за мяжой, 14 красавіка паведаміла на сваёй старонцы ў “Інстаграме” экс-палітзняволеная Антаніна Канавалава, якая нядаўна пакінула радзіму.
Паводле яе слоў, “апошнім часам беларускія сілавікі, у тым ліку супрацоўнікі КДБ, актыўна выкарыстоўваюць правакацыйныя метады для выяўлення інфармацыі ў актывістаў і проста нязгодных з рэжымам. Адзін з такіх метадаў — прапанова грошай за інтэрв’ю ці “шчырую размову”.
Канавалава сцвярджае, што да яе звярнуліся нібыта з расійскага праваабарончага цэнтра “Мемарыял” і прапанавалі грошы за інфармацыю. Нумар асобы, што тэлефанавала, зарэгістраваны ў Чылі.
