10 чэрвеня, Позірк. У пункце пропуску Брэст увечары 6 чэрвеня пагранічнікі затрымалі мужчыну, які меў намер выехаць у Польшчу з падробленым пашпартам, паведаміла 10 чэрвеня прэс-служба Дзяржаўнага пагранічнага камітэта.
На памежным кантролі, як сцвярджае ведамства, было выяўлена, што “пашпарт грамадзяніна Украіны мае прыкметы поўнай падробкі”. Пры аглядзе асабістых рэчаў “у яго быў знойдзены сапраўдны расійскі пашпарт”.
“Замежнік патлумачыў, што планаваў выехаць у Еўрасаюз да сваіх сваякоў”, — адзначыў Дзяржпагранкамітэт.
Паводле інфармацыі ведамства, мужчына затрыманы і змешчаны ў ізалятар часовага ўтрымання Брэсцкай пагранічнай групы. За спробу незаконнага перасячэння мяжы яму пагражае штраф да 100 базавых велічыняў (4.200 беларускіх рублёў).
У той жа час Дзяржпагранкамітэт нагадаў, што “за выкарыстанне падробленых дакументаў прадугледжана крымінальная адказнасць — абмежаванне волі на тэрмін да 2 гадоў”.
Пасля пачатку расійскай агрэсіі супраць Украіны Польшча і краіны Балтыі абмежавалі ўезд на сваю тэрыторыю для грамадзян Расіі.
