Дарадца Ціханоўскай абмеркаваў у Белым доме шляхі вызвалення палітвязняў

16 ліпеня, Позірк. Далейшыя крокі ў развіцці адносін паміж урадам ЗША і дэмакратычнымі сіламі Беларусі абмеркаваныя на сустрэчы дарадцы Святланы Ціханоўскай па дыпламатычных пытаннях Дзяніса Кучынскага з намеснікам дарадцы па нацыянальнай бяспецы прэзідэнта краіны, дарадцам па нацыянальнай бяспецы віцэ-прэзідэнта Эндзі Бэйкерам ў Белым Доме ў Вашынгтоне, паведамляе прэс-служба дэмлідара.

Таксама гаворка ішла аб шляхах вызвалення палітвязняў у Беларусі, “комплексным падыходзе да рэжыму Лукашэнкі”, у тым ліку падтрымцы беларускай грамадзянскай супольнасці і міжнароднаму ціску на ўлады.

Кучынскі перадаў ліст ад Святланы і Сяргея Ціханоўскіх прэзідэнту Дональду Трампу, а таксама падзякаваў амерыканскаму ўраду за паспяховае вызваленне беларускіх палітвязняў, у тым ліку — Ціханоўскага. 

“У Белым доме прайшлі цёплыя і плённыя кансультацыі. Эндзі Бэйкер мае вялікі ўплыў і грае важную ролю ў адміністрацыі прэзідэнта Дональда Трампа. Гэтая сустрэча — важны крок наперад у нашым дыялогу са Злучанымі Штатамі. Мы працягнем гэтую супрацу, дзеля вызвалення беларускіх палітвязняў і пазітыўных зменаў у нашай краіне”, — адзначыў Кучынскі.

У апублікаваным 13 ліпеня артыкуле брытанскага выдання The Sunday Times гаворыцца, што Святлана Ціханоўская і яе муж, былы палітвязень Сяргей Ціханоўскі хацелі б сустрэцца з Трампам.

10 ліпеня ў супольным артыкуле для італьянскага выдання Il Foglio Святлана і Сяргей Ціханоўскія заклікалі працягваць ціск на рэжым Лукашэнкі, “захаваць санкцыі ў сіле і пашырыць там, дзе гэта неабходна”, — асабліва ў дачыненні да “тых, хто фінансуе рэпрэсіі”.

У інтэрв’ю выданню Politico, якое было апублікавана 7 ліпеня, Ціханоўская заклікала Трампа працягваць аказваць ціск на Лукашэнку.