Здарылася ўцечка персанальных даных звыш 100 тыс. кліентаў будмаркета Mile

25 ліпеня, Позірк. Аб маштабнай уцечцы інфармацыі аб кліентах ТАА “Астомстрой” (сетка будаўнічых крам Mile) паведамляе Нацыянальны цэнтр абароны персанальных даных (НЦАПД).

Падкрэсліваецца, што ўцечка здарылася ў “выніку несанкцыянаванага доступу да інфармацыйнай сістэмы” гандлёвай сеткі.

Паведамляецца, што “ўцечка закранула больш за 109 тысяч суб’ектаў персанальных звестак”.

НЦАПД удакладняе, што староннія асобы маглі атрымаць наступныя даныя: прозвішча, імя і імя па бацьку кліента, індыкатар (ID), адрас электроннай пошты, нумар тэлефона, нумар карты праграмы лаяльнасці, даты рэгістрацыі/дэактывацыі.

“Аператарам аператыўна заблакаваны доступ да ўразлівага модулю. Праводзіцца праверка”, — гаворыцца ў паведамленні.

“Астомстрой” “абавязваецца інфармаваць усіх асобаў, закранутых уцечкай”, адзначае НЦАПД. Ён заклікаў кліентаў Mile “праяўляць асцярожнасць і быць уважлівымі ў выпадку паступлення званкоў з незнаёмых нумароў”.

“Не паведамляйце незнаёмцам канфідэнцыйныя звесткі пра сябе. Не спампоўвайце па іх просьбе прыкладанні, а таксама не адкрывайце спасылкі і ўкладанні, накіраваныя па электроннай пошце”, — заявілі ў цэнтры.

ТАА “Астомстрой” заснавана 2003 годзе. Асноўным відам дзейнасці кампаніі з’яўляецца аптова-рознічны гандаль будаўнічымі і аддзелачнымі матэрыяламі.