Мінабароны накіравала на ўборку ўраджаю вайскоўцаў ВПС і СПА, а таксама “дзясяткі адзінак ваеннай тэхнікі”

28 ліпеня, Позірк. Вайскоўцы Узброеных сіл “дапамогуць аграрыям ва ўборачнай кампаніі 2025 года”, паведамляе прэс-служба Міністэрства абароны.

Адзначаецца, што “прама цяпер зводныя ўзводы, сфарміраваныя з прадстаўнікоў вайсковых частак” Ваенна-паветраных сіл і войскаў супрацьпаветранай абароны, Паўночна-Заходняга і Заходняга аператыўных камандаванняў, “накіроўваюцца на дапамогу сельскагаспадарчаму сектару краіны”.

“Задзейнічаныя дзясяткі адзінак вайсковай тэхнікі”, — гаворыцца ў паведамленні.

“Асабісты склад Узброеных сіл будзе аказваць дапамогу беларускім аграрыям на тэрыторыі Віцебскай, Магілёўскай і Гомельскай абласцей. У прыватнасці — у Гарадоцкім, Сенненскім, Мсціслаўскім, Рагачоўскім, Кармянскім, Лельчыцкім раёнах”, — удакладнілі ў ведамстве.

27 ліпеня паведамлялася, што асабісты склад унутраных войскаў МУС “аказвае дапамогу” ААТ “Александрыйскае” (Шклоўскі раён Магілёўскай вобласці) “пры правядзенні сельскагаспадарчых работ”.

Адзначалася, што “ўклад вайскоўцаў у напаўненне засекаў па вартасці ацэнены кіраўніцтвам арганізацыі”.

“Гэтыя людзі — надзейныя абаронцы Айчыны, а цяпер зарабляюць славу выдатных хлебаробаў, якія паказваюць добрыя паказчыкі падчас уборачнай кампаніі. У сувязі з гэтым хочацца выказаць падзяку намесніку міністра ўнутраных спраў — камандуючаму ўнутранымі войскамі генерал-маёру Мікалаю Карпенкову за аказаную падтрымку і ўзаемадзеянне”, — заявіў намеснік дырэктара па ідэалагічнай і кадравай рабоце сельгаспрадпрыемства Андрэй Гудына.

Вайскоўцы ўнутраных войскаў МУС рэгулярна ўдзельнічаюць у сельгасработах на ААТ “Александрыйскае”. Год таму, у прыватнасці, яны збіралі рапс.

Прагназуемы валавы збор збожжа і збожжавых культур можа скласці каля 11 млн тон — “па запэўненні ўрада”, заявіў Аляксандр Лукашэнка 18 ліпеня падчас селектарнай нарады па пытаннях уборачнай кампаніі 2025 года.

Паводле слоў Лукашэнкі, гэта “трэба яшчэ без страт сабраць”.

“У вытворчасці прадукцыі сельскай гаспадаркі за паўгоддзе мы бачым недабор крыху больш за 2% да ўзроўню мінулага года. Так, уніз нас цягне вырошчванне свінапагалоўя, слабыя тэмпы нарыхтоўкі кармоў. Але неабходна не дапусціць падзення паказчыкаў па выніках года і пастарацца кампенсаваць недабор за кошт раслінаводчай прадукцыі”, — заявіў Лукашэнка.

Паводле звестак Белстата, у 2024 годзе валавы збор збожжавых і зернебабовых культур склаў 8,3 млн т (+8,8%). У 2023 годзе валавы збор збожжавых і зернебабовых культур склаў 7,7 млн тон, годам раней — 8,7 млн.

Раней Мінсельгасхарч паведамляў, што ў бягучым годзе сельскагаспадарчыя арганізацыі і сялянскія (фермерскія) гаспадаркі павінны забяспечыць вытворчасць збожжа ў аб’ёме 9,92 млн т.

Замаразкі ў траўні “зрабілі сваю брудную справу, нанёсшы нейкую шкоду пасевам”, аднак сітуацыя не крытычная, “катастрофы няма”, заявіў Лукашэнка 22 траўня.

Пра тое, што замаразкі сёлета ўвесну нанеслі істотную шкоду сельгаскультурам, 21 траўня сказаў намеснік прэм’ер-міністра Юрый Шулейка. Паводле яго сцвярджэння, “старажылы не памятаюць такіх умоў надвор’я”.

Намеснік кіраўніка Мінсельгасхарча Уладзімір Гракун 30 траўня заявіў, што нягледзячы на замаразкі, якія прывялі да гібелі пасеваў, ведамства разлічвае атрымаць ураджай збожжавых, цукровых буракоў, лёну, бульбы, агароднінных культур у аб’ёмах, “зацверджаных урадам”.