Начальнік штаба ВПС: НАТО занепакоенае нашым узроўнем баявой падрыхтоўкі

17 жніўня, Позірк. Для кантролю тэрыторыі і паветранай прасторы Беларусі “краіны НАТО выкарыстоўваюць увесь комплекс [і] арсенал разведвальнай авіяцыі”, заявіў начальнік штаба – першы намеснік начальніка авіяцыі ўпраўлення авіяцыі ВПС і войскаў СПА Андрэй Рачкоў у інтэрв’ю праграме “Арсенал” на тэлеканале “Беларусь 1” 17 жніўня.

“Адзначаюцца палёты над іх тэрыторыяй да шасці-васьмі вылетаў у суткі з павелічэннем да 12”, — сказаў ён (цытата дадзена ў арыгінале).

Рачкоў згадаў палёты тактычнай авіяцыі “не толькі ВПС Польшчы, але і іншых краін НАТО з выкарыстаннем аэрадромаў часовага базіравання ў Польшчы і краінах Балтыі, а таксама пад кіраваннем самалётаў далёкага радыёлакацыйнага выяўлення і кіравання”.

“Я думаю, яны аналізуюць абстаноўку — што робіцца на нашай тэрыторыі. Яны занепакоеныя нашым узроўнем баявой падрыхтоўкі”, — заявіў палкоўнік.

Каментуючы прыбыццё з Расіі 14 жніўня чарговай партыі самалётаў Су-30СМ, начальнік штаба ўдакладніў, што да канца года ў ВС чакаюць яшчэ чатыры такія машыны.

Самалёты названай мадэлі ўдзельнічаюць у аператыўна-тактычных вучэннях, якія працягнуцца на наступным тыдні на аэрадроме Ашулук (Астраханская вобласць РФ), сказаў ён.

У час сумесных з Расіяй вучэннях “Захад-2025” (12–16 верасня ў Беларусі) авіяцыя будзе занята ў аперацыйнай падтрымцы войскаў аператыўных камандаванняў, “дзеяннях <…> як па паветраных, так і па наземных цэлях”, дадаў Рачкоў.

“Гэта, вядома ж, выкананне задач баявога дзяжурства па супрацьпаветранай абароне сумесна з авіяцыяй паветрана-касмічных сіл Узброеных сіл РФ. Парадак узаемадзеяння з сухапутным складальнікам, парадак работы па выкліку па нованазначаных мэтах, па пошуку і выяўленню мэт з выкарыстаннем БПЛА, па навядзенню перадавых авіянаводчыкаў”, — пералічыў ён.

Мінск падтрымлівае Маскву ў развязанай ёю ў лютым 2022 года поўнамаштабнай вайне супраць Украіны.